Olukiiko olwayitiddwa okutabaganya abeesimbyewo ku kkaadi y'ekibiina kya NRM mu Kampala Central n'abo baamegga mu kamyufu kyokka ne batamatira lwaggweeredde mu kweyuza n'okuwaga nti kabattunke mu kalulu ka bonna mu 2021.
Abakungu okuva ku kitebe kya NRM e Kyaddondo abaakulembeddwa Mike Kennedy Ssebalu baatuuzizza olukiiko ku Hotel Ruch e Nakasero ku Mmande. Omu ku baawangulwa, Max Mboize nga yawangulwa Winnie Madinah Nsegumire ku kifo kya kkansala wa Nakasero III yacwanye nti tasobola kuvaamu ng'alumiriza nti yabbibwa. Yayombye nti eyeeyita omuwanguzi waliwo n'ebifo gy'atasobola kutuuka.
Muky. Nsegumire yafukamidde ne yeetondera Mboize amusonyiwe byonna ebyasoba era asaba amuwagire ku lw'obulungi bw'ekibiina oli n'agaana. Eyali minisita Francis Babu yatabukidde abeeyita aba NRM kyokka ng'omutima gubali ku ludda luvuganya. Yabuuzizza nti, "bw'oba ddala oli wa NRM lwaki yeesimba ku mulala alina kkaadi?"
Yasembye mutabani we Cedric Babu alina kkaadi ya NRM ku ky'omubaka wa Kampala Central ne mukyala we Margeret Zziwa nti buli omu alina eddembe okuvuganya kubanga waliwo ffamire ezizaalibwa nga za bakulembeze. Kyambadde yakkirizza okulekera Babu.
