MU lukiiko Loodi Mmeeya Erias Lukwago mwe yayombedde olwa Gavumenti okusala ssente zegenda okuwa KCCA, yayanjudde lipooti eyakoleddwa Ssaabaluggamya w'ebitabo bya gavumenti ku ddwaaliro lya KCCA eryatundibwa ku luguudo lwa Nkrumah mu 2008.
Yagambye nti amaze emyaka ng'asaba lipooti eraga engeri gye lyatundibwa. Lipooti yafulumiddeko omukono gwa John Muwanga. Lipooti eraga nti eddwaaliro lyatundibwa mu bukyamu, gattako ettaka kwe lyali litudde n'okumenyebwa kyali kimenya mateeka.
Yasinzidde kuno n'alabula buli eyeenyigira mu kutunda eddwaaliro lino nti waakunoonyezebwa era avunaanibwe. Yagambye nti abeenyigira mu kutunda eddwaaliro lino bagenda kukozesebwa nga kyakulabirako eri abalala abazze bagula ebintu bya gavumenti.
MINISITA TALINA BUYINZA KU BIPANDE BY'ABEESIMBYEWO
Ku bannabyabufuzi abatimba ebipande ku nguudo mu Kampala, Lukwago yagambye nti minisita wa Kampala talina buyinza kuyimiriza bannabyabufuzi kubitimba. Yategeezezza nti tewali tteeka ligaana munnabyabufuzi kutimba kipande ku nguudo mu kibuga n'akkaatiriza nti obuyinza bwonna buli mu kakiiko ka byakulonda.
