MINISITA w'abalema n'abakadde Hajati Sarah Kanyike agumizza abakadde nti emyaka kwe bafunira ensako yaabwe gavumenti egenda kugikendeezaako give mu 80 gikke ku 70.
Hajati Sarah Kanyike agamba nti ensonga zino yamaze dda okuzituusa mu lukiiko lwa Baminisita era lwe lulindiriddwa okusalawo.
Agamba nti gavumenti ekizudde ng'emyaka 80 omukadde kw'ateekeddwa okufunira ensako eya 25,000/- buli mwezi giri waggulu nnyo era bangi bakandaaliridde okuzifuna abamu ne batuuka okufa nga tebazikombyeko.
Kanyike bino abyogeredde Kayunga bw'abadde agabira abakadde 2,818 ssente 100,000/- buli omu ez'ensako gavumenti zeebawa buli mwezi nga zino za myezi ena okuli July, August, September ne October.
Agamba nti gavumenti era yakulowooza ku kwongeza ku mutemwa gw'ensimbi zino okuva ku 25,000/- zeeyongereko.
Minisita Kanyike yagambye nti abakadde era balina n'ekizibu eky'emwaka egiri ku ndaga muntu ng'abamu bakaddiye kyokka endagamuntu ziraga emyaka mitono ate abamu tebazirina era ku kino bamaze okuwandiikira abakulira abakozi ku disitulikiti zonna bakwatagane n'ekitongole kya NIRA batereeze ensobi zino abakadde bafune ssente.
