BETTY Ethel Naluyima nga ye mubaka omukazi owa Wakiso omulonde agamba nti ezimu ku nsonga ezimuleese mu palamenti kwe kulwanirira enguudo za Wakiso zikolebwe n'okulwanirira ensonga za Buganda.
Naluyima yasinzidde Bukasa mu Wakiso ku Ssande n'awera mu maaso ga Katikkiro Charles Peter Mayiga nti tagenda kuvumbeera ku nsonga za Buganda nga ababaddeyo bwe babadde bakola ne bwe kinaabeera kimwetaagisa kusigala bw'omu ng'ayimiridde ku nsonga zino ajja kukikola.
ENGERI GYE YEERANDIZZA
Ono ye mukyala eyawangudde Minisita w'ebyenjigiriza ebisookerwako, Rosemary Nansubuga Senninde ku ky'Omubaka omukazi owa Wakiso. Wabula, okwesimbawo ku kifo kino teyabiguddemu bugwi, abadde mumyuka wa ssentebe wa disitulikiti y'e Wakiso mu kisanja ekigenda okuggwaako nga y'avunaanyizibwa ku by'ensimbi.
Yasooka kubeera kkansala ng'akiikirira omuluka gwa Bweyogerere mu Kira Town Council era yali sipiika wa Kira mu 2006 -2011.
Yakomawo ku kifo kye kimu mu 2011 era n'awangula olwo Mamerto Mugerwa n'amuwa eky'omumyuka okutuusa mu 2016 lwe yasalawo okukiika ku disitulikiti e Wakiso.
NALUYIMA ALINA DDIGULI BBIRI
Yasooka kusoma dipuloma mu by'okukuba ppulaani gye yamalira ku yunivasite e Kyambogo. Alina ddiguli mu Information Technology (IT) ne ddiguli endala mu Information System gye yafunira ku Kampala International University. Mu byemizannyo asinga kunyumirwa kubaka mupiira.
Bazadde be be ba Christopher ne Bulyaba Kabwama ab'e Namulondo mu Bweyogerere. Yafumbirwa Tadius Nsubuga e Kitukutwe ekiriraanye Kiwologoma ne Bulindo mu divizoni y'e Bweyogerere mu disitulikiti y'e Wakiso.
YEEYAMYE KU NKULAAKULANA
Naluyima agamba nti ensonga endala z'atunuulidde kwe kulaba nga Wakiso egabana ku kkeeki y'eggwanga ereme kusigalira mabega mu bintu ebimu ate ng'eri kumpi n'ekibuga ekikulu Kampala. Yanokoddeyo amalwaliro, amasomero n'ebirala by'agamba nti kukyali kusoomooza kunene nnyo mu Wakiso.
Ku ludda lw'abakyala, Naluyima agamba nti yataddewo ekitongole kya ‘Naluyima Fund' ekigenda okubangula abakyala mu bintu eby'enjawulo olwo kibasakire ssente ezinaabayamba okukola pulojekiti ez'enjawulo nga bayita mu bibiina byabwe.
BWANIKA AMUWADDE AMAGEZI:
Ssentebe wa disitulikiti y'e Wakiso, Matia Lwanga Bwanika yagambye nti Naluyima yamusisinkana mu kibiina kya UYD bwe yali akyasoma ku yunivasite e Kyambogo emyaka 20 emabega.
Ono yamufuula mukwano gwe era ne basalawo okutambuza ebyobufuzi wamu. Bwanika agamba nti yawa Naluyima ekirowoozo ky'okwesimbawo ku bwakkansala e Bweyogerere era Naluyima n'akigula. Kyokka bwe yabeerayo ebisanja bibiri, mu 2016 Bwanika n'amusaba akiike ku disitulikiti era Naluyima n'akikkiriza.
Bwe yawangula akalulu, Bwanika yali ayagala Naluyima afuuke sipiika wa disitulikiti kyokka olw'entalo mu kkanso ne bamulemesa. Yamuwa eky'obumyuka bwa ssentebe wa disitulikiti omulimu Bwanika gw'agamba nti agukoze bulungi.
Nga waakayita omwaka gumu, Bwanika yasaba Naluyima yeesimbewo ku ky'omubaka omukazi owa Wakiso wabula Naluyima n'asooka akityamu. Bwanika yamugumya era oluvannyuma n'akkiriza.
Bwanika bwe yasalawo okugenda DP-BLOC ne Naluyima yamugoberera okutuukira ddala mu kibiina kya NUP gye bali kati nga bonna baafuniddeyo obuwanguzi.
"Obwesimbu, obwerufu, obutaba na mululu gwa ssente bye bimu ku bye nnalaba mu Naluyima era ebbanga lye nkoze naye nsuubira nti y'omu ku babaka abagenda okuba abalungi mu palamenti eddako. Mmusaba aleme kukyusa mu bw'abadde akola emirimu gye olwo naffe nga Wakiso tumweyagaliremu." Bwanika bwe yayongeddeko.
BAMUWADDE AMAGEZI
1.Shamim Nalwanga
Nze kyensuubira mu mubaka wange Naluyima, bwe butasuulirira nsonga ssemasonga ettaano eza Buganda, okukola abatuuze bye baagala ate aleme kukyuka na muyaga kubanga tusuubira okuteesa ku biyamba ekitundu mw'ava.
2. Godfrey Nsubuga; Yagenze mu kintu ng'akimanyi era tusuubira okuteeka mu nkola abantu ebibaluma, okufaayo ennyo ku byenjigiriza n'okute-eka amazima n'obwe nkanya mu buweereza bwe.
3.Patrick Katulamu; Bukyanga ava mu ssomero abadde aweereza mu Kira era mwana nzaalwa yaffe gwe tumanyi obulungi. Olw'omulimu omulungi gw'akoze mu Kira ye nsonga lwaki kati afuuse omubaka kubanga alwanirira nnyo
EBYAFAAYO BYE MU BYOBUFUZI
I Yatandikira Bweyogerere mu kkanso z'abavubuka n'ayingira mu kkanso z'abakyala ng'atambulira mu kibiina kya DP.
II. Mu 2006- 2011 yeesimbawo nga kkansala akiikirira okukiikirira eggombolola ya Kira. Wano we yafunira eky'obukubiriza bw'olukiiko lw'eggombolola.
III. Mu 2011-2016 yakomawo nga kkansala okuva e Bweyogerere n'afuuka omumyuka wa ssentebe mu town council ya Kira.
IV. 2016-2021 yajja nga kkansala ku disitulikiti y'e Wakiso okukiikirira Bweyogerere, gye yafunira eky'omumyuka wa ssentebe wa LC5 e Wakiso.
V mu 2021-2026 afuuse omubaka omukazi owa palamenti owa Wakiso.
