Bya DICKSON KULUMBA
GAVUMENTI esabiddwa okufuula yintanenti ey'obwereere kisobozese amasomero okusomesa abaana b'eggwanga okwanguwa naddala mu kiseera kino eky'okusoomoozebwa okwaleetebwa obulwadde bwa ssennyiga omukambwe.
Okusaba kuno kukoleddwa abadde Ssentebe w'olukiiko olufuga essomero ly'Obwakabaka erya Lubiri High School-Buloba Campus, Rashid Musisi Ssemanda bwe yabadde ku mukolo gw'okuwaayo obuvunaanyizibwa buno eri amuddidde mu bigere. Omukolo gwabadde ku kitebe ky'essomero lino ku kyalo Nabukalu mu ggombolola ya Mumyuka Wakiso mu Busiro ku Lwokubiri.
Olukiiko olupya lukulemberwa Amos Gitta ng'amyukibwa Badru Nduggwa, Dr. Proscovia Namayanja, Reagan Mugerwa, Lubowa Ssebina Gyaviira, Dr. David Kabugo, Hasifah Namulindwa, William Kijjambu- akiikirira abasomesa, Joseph Mugagga- akiikirira eggwanika lya Buganda, Leticia Nakimuli-akiikirira minisitule y'ebyenjigiriza mu Buganda.
Minisita w'ebyenjigiriza mu Buganda, Dr. Prosperous Nankindu Kavuma yasabye olukiiko luno okukozesa obukugu buli omu bw'alina okufuula essomero lino ery'omulembe era eryetanirwa mu nsi yonna nga bateekawo entegeka y'okunyweza enkola ya tekinologiya mu ssomero lino.
Gitta yeeyamye okutwala omulimu guno mu maaso n'ategeeza nti engabo bakugirumisa mannyo okulaba ng'obuvunaanyizibwa Kabaka bwe yabakwasizza babutwala mu maaso.
Source
