BANNABIBIINA ebiri ku ludda oluvuganya gavumenti batadde emikono ku ndagano ey'okulolera awamu mu kaweefube w'okutwala obukulembeze bw'eggwanga.
Omukolo gwabadde Hotel Africana ku Lwokusatu. Gwakubiriziddwa eyaliko Pulezidenti wa Democratic Party Dr. Kawanga Semogerere. Yagambye nti Uganda tebeerangako na kulonda kwa mazima n'obwenkanya ng'okukolera awamu kwe kuyinza okuyamba okuziba emiwaatwa gyonna egizze giremesa abooludda oluvuganya okuwangula obukulembeze. Yagambye nti kino kiri bwe kiti si lwakuba tetulina bannamateeka balungi okumalawo obumulumulu wabula obukulembeze obukyamu.
Yawadde eky'okulabirako ky'okulonda kw'akamyufu akaali mu kitundu ky'e Mawogola North mu disitulikiti ye Sembabule n'agamba nti kwaawa ekifaananyi ekibi ku kulonda kwa Uganda we kutuuse nga mwetobekamu abantu okufiirwa obulamu,okubakosa,okulwanagana wamu n'okuyiwaayiwa ssente ebintu bye yagambye nti biteekwa okulwanyisibwa.
Semogerere yayise ttabamiruka ono oluvannyuma lw'okusabibwa bannankyukakyuka nga October 7,2020 okukulemberamu kaweefube w'okulaba nti oludda oluvuganya lwegatta,lubeere n'omuntu omu ku Bwapulezidenti mu kulonda kwa 2021.
Okwogerezeganya kuno kwavuddemu ekiwandiiko ekigenda okuteekebwako emikono abakulira ebibiina okukolera awamu okulongoosa obukulembeze bw'ensi yaffe," Dr. Semogerere bweyagambye.
Mu kiwandiiko kino bakkiriziganyiza okuteekawo omukago ogw'okukyusa obukulembeze nga mulimu abeesimbyewo n'abakulembeze b'ebyobufuzi bonna.
Abaataddeko emikono kuliko:Dr. Sempala Mayambala ng'ono ye Ssentebe wa DP, Muhammad Kibirige Mayanja nga ye Ssentebe wa JEEMA,Amb. Wasswa Biriggwa, Ssentebe wa FDC, Dr. Zedriga Waru nga ye Mumyuka wa Pulezidenti wa NUP atwala obukiikakkono, Wilberforce Sseryazi Omwogezi wa ANT, Omar Kalinge Nyago nga ye Ssentebe w'ekisinde Renewed Uganda wamu ne Erias Lukwago nga ye mumyuka wa Pulezidenti w'ekisinde kya People's Government ekikulemberwa Dr. Kiiza Besigye.
