DONALD Trump yatunuulidde amaka g'Obwapulezidenti aga White House nga tegalekeka kyokka ng'akadde kamuweddeko n'akwata ekkalaamu n'awandiikira Joe Biden eyamuddidde mu bigere akapapula n'akasonseka ku mmeeza wansi n'afuluma mu bwennyamivu.
TRUMP AWANDIISE EBBALUWA
Olwamaze okulayira n'ayingira ofiisi, ku kapapula Biden kwe yatuukidde n'akasoma n'anyeenya omutwe olw'ebyakabaddemu wabula n'ategeeza abaabaddewo nti, sirigamba muntu yenna musajja ono (Trump) bye yawandiika ku lw'okumuwa ekitiibwa okuggyako ng'anzikirizza kyokka yawandiise ebintu eby'obukkakkamu.
KKWIINI AMUKULISIZZA
Ebbaluwa endala Biden gye yasanze mu ofiisi yabadde ya Kkwiini Elizabeth II owa Bungereza eyamukulisizza okuwangula Trump kyokka nga kino yakikoze amaze kulayira.
Baawolerezza Kkwiini nti bw'atyo bw'azze akola nga yali tagaanye bugaanye kumukulisa olwa Trump okusooka okugaana ebyava mu kulonda. Ebyabadde mu bbaluwa eyo nabyo Biden yagaanyi okubyogera era bannamawulire abamu baanyiigiddewo nti omusajja alabika taabakolere mawulire nga Trump bw'abadde.
Okusinziira ku mawulire ga CNN mu Amerika, olwo Biden yabadde atandise emirimu gye ku Lwokusatu era mu ssaawa emu yokka gye yamaze mu ofiisi, yabadde amaze okussa emikono ku mateeka 17 agassibwawo Trump agabadde ganyiga Abamerika.
Mu mateeka mulimu buli mukozi wa Gavumenti n'abakolera mu bizimbe bya Gavumenti okwambala masiki n'Abamerika bonna okubakakatako okuzambala okulwanyisa okusaasaana kwa COVID-19 Trump gw'abadde azannyisa obuzanyisa n'atta Abamerika 400,000.
ABAKULEMBEZE B'AMAWANGA BASANYUFU KU BIDEN;
Pulezidenti wa Bufaransa, Emmanuel Macron yeebazizza Biden olw'okussa omukono okuzza Amerika ku ndagaano y'okukuuma obutonde bw'ensi eyakolebwa mu kibuga Paris ekya Bufaransa wabula Amerika ebadde yagivaamu.
Pulezidenti wa Mexico, Andres Manuel Lopez Obrador eyayomba ne Trump olw'olukomera lw'alese azimba okwawula Amerika ku Mexico olw'abagwira abeeyiwa mu Amerika okuyita eyo, yasanyuse olwa Biden okuddiriza nnatti ku baagala obutuuze bwa Amerika n'abagendayo mu bukyamu.
LOONI Z'ABAANA B'AMASOMERO;
Yawewudde abaana b'amasomero abalina looni mu bbanka ezaabawola ssente okusoma n'abalala abaaweererwa Gavumenti obutaddamu kusasula looni okutuuka mu September, 2021 olwa COVID-19.
Abayizi abeeweerera mu matendekero aga waggulu mu Amerika babanjibwa obuwumbi 1600 obwa ddoola ($1.6 trillion).
TRUMP ALESE AWADDE ABAANA BE OBUKUUMI
Abakozi ba White House baagudde ku biwandiiko ebiraga ng'abadde Pulezidenti wa Amerika, Donald Trump okuva mu ntebe yamaze kussa mukono ku kiragiro ekiwa abaana be obukuumi okuva mu ggye lya Secret Service erikuuma Pulezidenti wa Amerika.
Amagye gano gakuuma Pulezidenti ne bw'aba avudde mu buyinza kyokka tegakkirizibwa kukuuma baana baabwe nga Trump bwe yalese alagidde.
