Bya MOSES LEMISA
Nze Slyvia Nabasumba 22. Engeri gye ntawaanyeemu n'abasajja ku myaka emimpi gye nnina ntuuse okulowooza nti osanga sibalinaamu mukisa. Mu 2014 nafuna omusajja twali tubeera naye e Bukomero, era ne tuzaala n'omwana wabula ng'ankuba okukira akuba eky'okuttale!
Kuno kwe yagatta obutandabirira era mu 2018 ne musegulira n'omwana ne mmumulekera. Bwe nnava eyo nagenda e Magoma mu disitulikiti y'e Nakaseke gye nafuna omusajja omulala. Ono yali abeera kumpi ne bazadde be, wabula nga mwavu lunkupe.
Twakkiriziganya ne tutandika okukuba amatoffaali era akasente ne kawera, wabula ate bazadde be ne batandika okunjogerera amafuukuule, ate nga naye tafaayo. Twazimba ennyumba, wabula olwagiyingira n'anfuumuula era tebampa wadde obuyambi bw'omwana waabwe.
Nnali ntunda eby'okulya ku ssomero lye Magoma ate COVID -19 we yayingirirawo amasomero ne bagaggalawo. Bwe wabaayo asobola okunnyamba anfunire eky'okukola ndi ku ssimu 0779119435.
