ABAVUBUKA abasaasaanya amawulire ku mitimbagano mu kitundu ky'e Busoga (Bloggers) bavuddeyo ne bakunga ababaka ba Palamenti abava mu Busoga n'ebitundu ebirala okuwagira Sipiika Rebecca Kadaga okusobola okweddiza ekifo kino.
Bano abakulembeddwaamu Prossy Mwanjuzi basinzidde mu lukiiko lwa bannamawulire ku Namujeere Guest House mu Namutumba Town Council.
Bagamba nti Kadaga akoleledde nnyo Busoga n'okutunda eggwanga lyaffe ng'ate mukyala mwesimbu n'obutaba na kyekubiira mu Palamenti.
Era basabye Pulezidenti Museveni n'olukiiko lwa CEC okuwagira Kadaga kubanga yayamba ekibiina kya NRM okulaba nga Museveni awangula.
Kadaga ayagala ekisanja ekyokusatu ku kifo kya Sipiika ekiriko embiranye wakati we n'omumyuka we Jacob Oulanyah.
