Yiga 43, yafudde mu kiro ekyakeesezza Olwokubiri nga October 20, 2020 wabula bwe yali tannafa yali yalaama omulambo gwe gusuzibwe ku katuuti okumala ennaku ttaano kyokka kino kyajjululwa olw'embeera ne basooka bakkaanya omulambo gusule mu kkanisa ennaku bbiri okuva olwaleero (ku Lwokutaano) okutuuka ku Ssande lw'agenda okuziikibwa.
Kyokka enteekateeka eno poliisi egirinnyeemu eggere era mu lukiiko olwatuulidwaamu ku Lwokusatu akawungeezi abaffamire, ekkaninsa ne poliisi eyabadde ekulembeddwa RPC wa Kampala North, Peter Nkulega baakisazizzaamu ne bakkaanya omulambo gwa Yiga baguleete enkya ku Lwomukaaga okwewala obuvuyo obuyinza okubaawo ng'abantu abangi bakuhhaanye ekiseera ekiwanvu.
EBYOKWERINDA BINYWEZEDDWA
Obyekwerinda byongedde okunywezebwa ku kkanisa e Kawaala okuviira ddala ku kkubo wateereddwaawo bakanyama nga basooka ku kwaza, okunaaba mu ngalo tteeka era okuva ku kkubo okutuuka ku kkanisa waliwo ebifo ebinaabirwamu engalo bya mirundi ebiri.
Okuyingira mu kkanisa munda wagguddwako emiryango ebiri gyokka ogumu guyingiza bantu era wano bakanyama basooka ku kwekebejja ate era bw'oba ofuluma olina kukozesa mulyango mulala nga nawo bakanyama bakwebejja okukakasa nti tolina ky'otutte.
