ABA NRM batongozza abantu abagenda okuyambako okukuuma akalulu ka Pulezidenti Yoweri Museveni akagenda okukubibwa nga January 14, 2021. Omukolo guno gwabadde ku ofiisi ya ssentebe wa NRM e Kyambogo nga gwakulembeddwa Milly Babirye Babalanda omuyambi wa ssentebe wa NRM ne Moses Kigongo omumyuka wa ssentebe wa NRM mu ggwanga.
Abantu abaatongozeddwa baasunsuddwa okuva mu bitundu eby'enjawulo mu ggwanga. Maj.Gen. Henry Matsiko omulung'amya w'ebyobufuzi mu UPDF yagambye nti amagye n'ebitongole ebirala ebikuumaddembe, beetegefu okukuuma Bannayuganda mu biseera by'okulonda era abantu bano baleme kutiitiira baleme okugenda okukola omulimu ogubatumiddwa.
Ate dayirekita w'ekitongole kya poliisi ekikessi, Christopher Ddamulira yagambye nti, mu kiseera kino bamaze okumanya ebifo eby'obulabe era eno bagenda kuteekayo obukuumi obwenjawulo ng'okulonda tekunnatuuka ne bwe kunaaba nga kuwedde.
Babirye Babalanda alabudde bammemba ba NRM abaagala okukozesa ssente z'ekibiina okwekkusa n'awera nga bwe bagenda okubakolako era ssente ze bagenda okufulumya zigenda kubaako obukwakkulizo kubanga ofiisi ya ssentebe tesobola kukkiriza bafere kubeerimbikamu.
Be baatendese okukuuma akalulu abakubirizza okukuuma akalulu ka Pulezidenti Museveni wadde nga tebannaba kufuna ssente kubanga akalulu kano ka mugaso nnyoka Museveni okukuuma emirembe egiriwo. Yagambye nti okuwangula akalulu tebagenda kufa ku muwendo gwa bantu naye bafaayo nnyo ku ngeri gye beeteeseteese okulaba nga NRM esigaza obukulembeze era n'ayongerako nti wadde NRM yamaanyi bagezezzaako okuziba emiwaatwa gyonna egiriwo abali ku ludda oluvuganya mwe bayinza okuyita okwezza obukulembeze.
Babalanda yagambye nti balina okumanya engeri akalulu gye kaddukanyizibwamu kubanga omulundi oguwedde baafunamu okusoomoozebwa ku nsonga eno era waliwo ne baagenti abatali beesigwa abaatunda obuwanguzi bwabwe era bakyagenda mu masso n'okusunsula abo baagenti be balonze.
ra nti waliwo bammemba ba NRM abeemulugunya olw'obutabaawo ssente wabula n'abagamba nti, bakole omulimu gwabwe ssente bagenda kuzifuna kubanga luno bali ku lutalo lwa kuwangula emirembe egiriwo gisigalewo. Hajji Kigongo yalabude abaatendekeddwa obuteegulumiza nga balowooza nti tebasobola kukwatibwako era n'abakuutira okuteeka mu nkola ebyo bye bayize mu ngeri y'okukuuma akalulu.
Yabagambye nti bwe bafuna obuzibu bategeeze ku bakama baabwe babawabule naye nga balina okufuba okulaba nga bakuuma akalulu ka Museveni. Abakungu ba NRM okubadde Saleh Kamba ne Idris Kusiima be baasomesezza abantu bano okukumamu akalulu ka Museveni basobole okutuka ku buwanguzi.
