Bya JAMES MAGALA
PASITA Paul Musisi, akulira ekkanisa ya Caring Heart Ministries e Kaggala mu Wakiso adduukiridde ttiimu y'essaza lya Busiro n'alaajanira bannabyamizannyo abawangudde obubaka bwa Palamenti obuteerabira mizannyo.
Bino yabikoze ku Ssande bwe yakyazizza ttiimu ya Busiro n'agiwa omuceere, obuwunga, amazzi ne ssente enkalu ssaako okubasabira bawangule ekikopo ky'omupiira eky'Amasaza ga Buganda. Pasita Musisi, era nga y'akulira ekibiina ekigatta abaazannya ku mupiira ekya Former Players Initiative yennyamidde ku ngeri bannabyamizannyo gye basuuliriddwaamu ensangi zino.
"Ndi musanyufu olwa bannabyamizannyo ab'enjawulo abaawangudde ebifo by'obubaka bwa Palamenti okuli pulezidenti wa FUFA, Moses Magugo, Paul Nsubuga maneja wa ttiimu yaffe eya Busiro n'abalala. Bayogeeyoge kyokka mbasaba okukiikirira obulungi bannabyamizannyo babatuusize eddoboozi lyabwe okulaba nga bava mu mbeera embi," bwe yategeezezza.
Magogo yawangudde obubaka bwa Budiope East ate Nsubuga y'owa Busiro North. Yasabye Nsubuga okukozesa ekifo kye ekipya okukuza ttiimu ya Busiro esukke ku musingi gw'Essaza ku ssaza.
