Bya SAUL WOKULIRA
OKULONDA Ssentebe wa disitulikiti ne Bakansala b'e Kayunga kutandise kikeerezi olw'abalonzi okulwawo okugenda mu bifo awalonderwa.
Ebikozesebwa byatuuse mangu ku ssaawa 12:00 ez'oku makya wamu n'abalondesa wabula abalonzi batandise okutuuka ku ssaawa 3:00 ez'oku makya.
Ku ofiisi z'akakiiko k'ebyokulonda wabaddewo okwesika ebitoji ng'abaserikale abakuuma obululu n'abalondesa ng'abaserikale balemedde bbokisi z'obululu olw'abakulira eby'okulonda obutabawa ssente z'entambula 10,000/- era abamu ku baserikale tebaagenze we balondera.
Olwokaano lwa bassentebe lulimu abantu mwenda wabula ng'abali ku mbiranyi kuliko Andrew Muwonge owa NRM ne Ffeffekka Sserubogo owa NUP.
Sserubogo alondedde Kyebanja ku sitoowa ate Muwonge alondedde Nakaliro. Mu bifo ebimu awalonderwa tewabaddewo buuma obukebera ekigalo ne bwiino ow'okusiiga ku ngalo.
