MINISITA w'enkulakulana y'abantu ba Buganda era avunanyizibwa ku Ofiisi ya Nnabagereka, Dr. Prosperous Nankindu Kavuma asabye abazadde okulabirira bulungi abaana naddala mu kiseera kino eky'obulwadde bwa kkolona n'okulonda abakulembeze.
Bino abyogeredde Bulange-Mmengo enkya ya leero bwabadde ategeeza ensi nga bweboongezaayo Ekisaakaate Kya Nnabagereka ng'ekiseera ekituufu kyakulangirirwa embeera y'ebyensoma mu ggwanga eteredde.
Bulijjo Ekisaakaate kya Nnabagereka kitegekebwa mu Gatonya (January) era kyasemba kutegekebwa mu January 2020 ku ssomero lya Hana International School e Nsangi- Busiro ng'abamu ku bakulu baalyo ye Mugagga Ham Kiggundu.
