Gomba 5-0 ASKA
ABAAGUZANNYIRAKO mu ttiimu za ‘super' ne Cranes baavudde ku kisaawe ky'ettendekero ly'abasomesa ba pulayimale erya Kabulassoke PTC e Gomba ng'ennyindo y'enkata oluvannyuma lw'okutimpulwa (5-0).
Abubaker Tabula (SC Villa), Ibrahim Kongo ne Jimmy ‘Kacanga' Kakooza (KCC), Herbert Ntege (Victors), Musa Kafeero, (Masaka LC) n'abalala be baakyadde e Gomba mu ttiimu yaabwe eya All Stars Kampala Association kyokka baagenze okuvaayo nga bakkirizza nti mu kucanga akapiira, ttiimu y'essaza ly'e Gomba eri mmo.
Mu mupiira guno, Charles Bbaale ne Juma Lutakome aba Gomba baateebyeko ggoolo bbiri buli omu, Ali Bayo n'akuba endala. Omupiira we gwaggweeredde ng'aba ASKA (All Stars Kampala Association) bawona buwonyi kuba Gomba baagifuuye enfunda eziwera nga ddiifiri agamba nti bakuumye nga waliwo ne ggoolo endala bbiri Gomba ze baakubye ne bazisala.
Gomba bazannye emipiira gy'okwegezaamu ne ttiimu eziwerako wamu n'amasaza okuli gye baakuba Kooki (4-1), Butambala (2-0), Buweekula (3-0), Busujju (2-0), Mawogola (2-0) n'emirala.
"Ekigendererwa ky'emipiira gino kya kugezesa basambi baffe ng'era omwaka guno twagala kutwala kikopo ky'Amasaza,"akulira ebyekikugu mu ttiimu y'essaza ly'e Gomba, Felix Ssekabuuza Kawooya bw'agamba.
