EBIZUUSE ku bantu abaawambibwa byongedde okweraliikiriza ffamire zaabwe oluvannyuma lw'abamu ku bannaabwe okuzuulibwa, wabula nga bali mu mbeera mbi.
Minisita w'ensonga z'omunda Gen. Jeje Odongo ng'agenze mu Palamenti ku Lwokusatu okuwa lipoota ku bantu ababuzibwawo nga kigambibwa nti bakwatibwa bitongole bya byakwerinda, yategeezezza nga bwe waliwo abantu 31 poliisi b'etannaba kumanya mayitire.
Kino kyayongedde okweraliikiriza ffamire z'abantu abo nga tebakakasa oba bakyali balamu oba baatuusibwako obuzibu obw'amaanyi ate nga yonna gye babanoonyerezza nga teri kituufu kye bafuna.
ABAZUULIDDWA BALOJJA BWE BAABATULUGUNYIZZA
Abatuuze be Bulaga ku lw'e Mityana babiri okuli Vincent Ssebanyiga ne Paul Kayanja abaawambibwa ne batulugunyizibwa batenda okutulugunyizibwa okuli gye babadde bakuumirwa.
Baawambibwa ku lunaku lumu ku Ssande nga January 31, 2021 okuva ku ssundiro ly'amafuta erya Shell e Bulaga. Be bamu ku boogerwako nti babadde tebamanyiddwaako mayitire wabula baazuuliddwa naye nga bali mu mbeera mbi ddala.
Vincent Ssebanyiga bwe baamuzudde baamutwaliddewo mu ddwaaliro era abasawo ne basalawo okumuteeka ku byuma bimuyambeko mu kussa olw'embeera gye yabaddemu.
Muganda we Shafic Kayongo eyabadde amujjanjaba yagambye nti muganda we okumuwamba baamusanga Bbira ku Super Market esangibwa ku ssundiro ly'amafuta ng'aliko by'agula.
Abaserikale okwali abambadde ebyambalo by'amagye n'ebya poliisi nti baamukwata ne bamusiba ekiwero mu maaso ne bamuyingiza emmotoka eyakazibwako "Drone" ne bamuvuga nga bamwolekeza oludda lw'e Wakiso. Byaliwo nga January 31, 2021.
Kayongo yagambye nti muganda we yamutegeezezza nti mu kumukwata baasooka kumubuuza mmundu era n'abategeeza nti tabeerangako na mmundu kuba ye musuubuzi.
Mu kiseera ekyo muganda we yalina ssente mu nsawo akakadde kalamba z'agamba nti abasirikale baazimuggyako ne bagenda nazo era ne bwe baabadde bamuyimbula tebaazimuwadde.
Baamukubisa bbatuuni, okumusamba buli kitundu kya mubiri okutuuka ku ssa ly'okubeera nga takyamanyi biri ku nsi. Abazirakisa be baaleese amawulire ku Lwokuna nti omuntu waabwe ali Wakiso okumpi ne kkooti nti naye ali bubi, olwo aba ffamire gy'ajjanjabirwa.
Paul Kayanja naye ali mu ddwaaliro yagambye nti abantu bangi abaakwatibwa mu kiro ekyo era buli eyakwatibwanga nga bamusibako ekikookolo ku maaso. Omubiri gwa Kayanja gwonna guwulubadde naddala emikono n'amagulu byalumiriza nti byava ku miggo egyamukubwa.
Ekimuluma kwe kuba ng'abakwate abaalinawo ku ssente eziwera obukadde obusatu baayimbulwanga nga zimaze okutuuka. Abataalina ssente baabalinnyisa emmotoka ekika kya ‘drone' ne babongerayo.
Kayanja mu kiseera ekyo yalina 1,300,000/- era olwamukwata ne bazimuggyako. Baabavuga ne babatwala ku poliisi ye Wakiso era ye agamba nti enkeera baabatwala mu kkooti y'e Wakiso ne baggulwako emisango egyekuusa ku kusaasaanya obulwadde bwa Corona.
Wadde nga kkooti yamuyimbudde ku kakalu ka kkooti, naye bwe yamusaba ssente nti n'amutiisatiisa okumuzza mu kkomera.
BABIRI BABASUDDE KU LW'E MITYANA NGA BALI BUBI
Kayanja yagambye nti ali mu kutya kwa maanyi kuba ku kyalo kye baasooka kuwamba ssentebe w'e Ssumbwe Charles Kabanda ate oluvannyuma abasajja ne bakomawo ne bawamba abantu abalala era naye mwe yagendedde.
Charles Kabanda eyatwalibwa n'akuumirwa mu kifo ekitamanyiddwa okumala ebbanga wabula oluvannyuma n'ayimbulwa nga tategedde na kyamukwasa, yeekokodde enkola y'abakuuma ddembe era nga zino aziyise mpalana z'abantu.
Yagambye nti ye mu buwambe yamalayo ennaku 21 oluvannyuma ne bamusuula e Bulaga nga bamutulugunyizza kuba yakubibwa ekisusse.
Ekisinga okumuluma kwe kuba nga tewali musango gwe baamuggulako. Obuzibu yabutadde ku bantu abalina ku bannaabwe empalana abakozesa ebitongole ebikuumaddembe.
Patrick Onyango omwogezi wa Poliisi mu Kampala n'emiraano. yawadde ffamire z'abantu abazze bawambibwa amagezi bagende ku kitebe kya Professional Standards Unit (PSU) e Naggulu baggulewo emisango ku bantu be bateebereza okuwamba n'okutulugunya abantu baabwe.
Yagambye nti teri muserikale akkirizibwa kuggya ku muntu yenna ssente wadde okumutulugunnya era yenna aba akikoze abeera alina okuvunaanibwa nga muntu kubanga eyo ssi nkola ekkiririzibwamu ebitongole ebikuumaddembe.
Abooluganda n'emikwano gy'abantu abazze babuzibwawo balaze akaseera akazibu ke bayitamu kuba batambudde obwoya kujula kubaggwa ku ntumbwe ne bababulwa.
RONALD MUGERWA AKYABUZE
Sharon Kangume, mukyala wa Ronald Mugerwa omusuubuzi we Buwama eyawambibwa agamba nti bba yakwatibwa nga January 6, 2021 emmotoka y'ekika kya Drone ne Super custom zaabasalako nga bali mu kifo ekimu ekya Equator Gardens e Nabusanke ne mukwano gwe Abdu Rashid Nkinga eyawangudde obwa ssentebe bwa Buwama Town Council.
Abasajja nga musanvu abaalina pisito baabakaka okulinnya mu mmotoka , era aboluganda baagenda ku poliisi ye Nabusanke ne baggulawo omusango ku Ref; SD 04/06/01/2021
"Nsonga ki ddala ekwasa omuntu omwezi mulamba ng'okimanyi alina ffamire gyalabirira. Osiba otya omuntu omwezi nga tomututte mu kkooti" Kangume bwe yeemulugunyizza.
Yagambye nti kisingako okuwera ebyokulonda abantu bakimanye nti Gavumenti teyagala bantu bagivuganya.
Wadde nga batambudde mu bifo ebiwerako kyokka tebayambiddwa nga ku CMI, e Kitalya ne mu nkambi ye Bombo gye baasisinkanidde Lt. Col. Ochaka n'abasuubiza okubayamba. Kyokka fayiro zonna ze baanoonyezza abantu baabwe tebaliimu.
Alumiriza nti waliwo n'abantu abalala bangi abazze bawambibwa e Buwama okuli; Alex, Buyaaya, Baker ne Emma Bazira.
Sarah Namuli mwannyina wa Mugerwa eyabadde ayogera ng'akulukusa amaziga yasabye bababuulire gyali omutima gubakke kuba obweraliikirivu balina bwa maanyi.
Sharif Kasozi naye talabika.
Kenneth Semwanga owe Kireka mu katale yagambye nti abaawamba Kasozi 17, baali baserikale nga bambadde enkofiira emyufu eza militare nga January 24, 2021. Kasozi ye mubaka Ssemujju Nganda gwe yatwala mu Palamenti nga yeemulugunya era ekyaviiriddeko Gavumenti okufulumya lipooti ku bantu bonna abazze bawambibwa.
Baasooka kusimba layini nga batuuze mu katale ka Central Market e Kireka. Abasirikale baali musanvu nga buli omu akutte emmundu bbiri nga kuliko atayambadde yirifoomu omu.
Baabalagira buli omu okusigala waali. Omu yagenda ewaali Kasozi n'amusongamu omudumu gw'emmundu n'amusika okuva mu kiyumba ky'enkoko mwe yali n'amufulumya wabweru.
Tewali kigambo kyonna kye baayogera era yali agezaako okukwata ebifaananyi omuserikale n'amusongamu emmundu n'abivaako.
Ronald Nkalubo, ssentebe omulonde owa Namugongo divizoni yagambye nti bagenze ku poliisi enfunda eziwera okuli; Kira, CPS, Jinja Road ne Kireka kyokka yonna abaserikale b'agaana okuyingiza omusango mu bitabo.
ABALALA BATAANO BAAKWATIBWA
E Kireka ku Musenyu wakati wa November 18 ne January 13, 2021 baawambawo abantu musanvu nga babiri bokka be baakayimbulwa. Ababiri tebannaba kumanyika gye bali.
Robert Kategere omuwandiisi w'ekibiina ekigatta abatunda omusenyu ekya Kireka Sand Dealers and Transporters Cooperative Society yagambye nti Wilberforce Kamunyolo, Abdallah Ssentongo amanyiddwa nga ‘John Kido', Laban Mugabi n'omulala eyeeyita Mike Ezra bonna baatwalibwa November 18, 2020 ku lunaku Bobi lwe yakwatibwa e Luuka.
Abaabakwata baali baamagye ate Hassan Mutebi yatwalibwa January 13 n'abalala babiri okwali; Magaya ne Mukiibi. Kyokka ababiri baayimbulwa naye Mutebi teyateebwa. Abaabakwata baali mu ngoye za bulijjo ne babalinnyisa Double Cabin naye tebaddangamu kubalabako.
BANA BE BAABUZIBWAWO E BUNNAMWAYA
Esther Grace Nakitto, eyawangudde obwakkansala bwa Kikajjo - Kasenge -Kyengera ward yagambye nti wiiki ssatu eziyise abasajja bajja kiro ku ssaawa 8:00 ku kyalo nga batambulira mu mmotoka ya drone ne bakwata abantu bana okuli; Moses Kibirango,
Joseph Kigozi, Godfrey Magunda ne Jude Semanda.
Magunda yabadde yeesimbyewo ku bwakkansala okukiikirira omuluka gwe Katale - Bukunda era yawangulidde mu buwambe.
Abalala abakyanoonyezebwa ku bantu 31 minisita Jeje Odongo be yayogeddeko abakyanoonyezebwa kuliko;
Mohammad Kamata yakwatibwa ku kyalo Walusimbi mu ggombolola ye Nama e Mukono, abasajja musanvu abaali mu byambalo by'ekijaasi bwe baalumba ekyalo ne bamuggya mu nnyumba ku ssaawa 8:00 ez'ekiro.
John Bosco Sserunkuuma yawambibwa e Nansana nga December 3, 2020. Ritah Babirye, Ali Sebaduka, Emma Kibirige, Sula Muyanja, Twaibu Ddumba baamuwamba okuva ku bbajjiro e Bwaise nga November 19, 2020. Waliwo abantu 10 abagambibwa okuwambibwa e Kyebando - Nansana nga bali ne Rogers Galiwango eyalabika nga wayise ennaku ssatu. Kyokka abalala 10 tebamanyiddwa gye bali.
