Kiwanuka entanda eno yamusibiriddwa ku Lwokutaano bwe yabadde akyaddeko e Mengo okwanjulira Obuganda emisippi gy'asobodde okuwangula omwaka oguwedde 2020 n'okulangirira oluzannya lw'alina mu April n'Omumerika Olivia Makoel.
Katikkiro yasabye Kiwanuka okutwala omuzannyo gw'ebikonde ng'omulimu kuba gulimu ssente mpitirivu ezigaggawaza omuntu mu budde obutono ennyo.
Yamusabye nti bw'aba waakukuza kitone kye n'okusukkuluma alina okukola ennyo okulinnyisa omutindo gwe buli lukya nga yettanira ggiimu n'okwekwata ku baaguzannyako.
Okulya obulungi kirina okuba ekitundu ku bulamu bwa munnabyamizannyo, Kiwanuka alina okufuba okulya ebyo byokka ebigasa omubiri sso ssi kumala galya buli ky'assanze.
Alina okwewala ebitamiiza n'ebiragalalagala kuba tebirina kye byongera ku maanyi munnabyamizannyo g'alina okukozesa wabula okuttattana obulamu bw'omuntu.
Katikkiro agamba nti bannabyamizannyo abasinga bakyusa abakazi ng'ebikooyi naye yalabudde Kiwanuka okwewala abawala abamuwaanawaana olw'ekitone wabula atunuulire ebiseera by'omu maaso.
Empisa kintu kikulu eri munnabyamizannyo, Kiwanuka alina okugondera abatendesi, bazannyi banne, baddifiri n'abamuteekamu ssente okutunda ekitone kye.
"Tukooye bannabyamizannyo abannyuka ne basigala nga basabiriza olw'okulemererwa okweterekera olw'ebiseera by'omu maaso. Kiwanuka olina okukozesa obulungi emyaka gyo ng'otereka ssente mu bintu ebizza amagoba okugeza; ettaka, amayumba n'ebirala," Katikkiro bwe yakkaatirizza.
Kiwanuka y'alina omusippi gw'Afrika mu buzito bwa Heavy Weight gwe yawangula omwaka oguwedde nga kati yeepikira Mumerika.
