Israel Musaazi nga y'amyuka ssentebe w'e Kamwokya - Kifumbira zooni ye yakwatiddwa n'akulira eby'okwerinda Christopher Habomugisha oluvannyuma lw'abaserikale okusooka okukwata Baker Musoke eyabadde ddereeva we ne Richard Ndagizimana akola ogw'obutembeeyi ababadde babutambuliza mu mmotoka.
Amyuka omwogezi wa poliisi mu Kampala n'emirirwano Luke Owoyesigyire yagambye nti okukwata Musaazi kyaddiridde abaserikale abatambulira ku mmotoka ennawunyi okugwa ku mmotoka nnamba UAG 107D eyabadde evugibwa Musoke ng'alimu ne Ndagizimana nga balimamu ebikutiya by'obutimba bw'ensiri 3 mu bitundu bya Old Kampala.
Yagambye nti mukukaza ennyo Musoke ne Ndagizimana ku bikwata ku butimba baayatudde nti obutimba buno baabujje Kamwokya ew'omumyuka wa ssentebe w'ekyalo era ne babatwalayo nabo ne bakwatibwa.
Yategezezza nti abaserikale olwakutte Musaazi bamututte ku poliisi ya CPS n'akola sitatimenti mwe yategerezza nga obutimba bw'ensiri Misitule y'eby'obulamu bwe yaweereza mu kitundu kye nga bwe bwali tebubunye mu batuuze n'asalawo okuwandiika ebbaluwa ng'asaba obulala.
Yagambye nti Musaazi yabuulidde abaserikale nti mu bbaluwa gye yawandiika yasaba ekkutiya z'obutimba 13 kyokka yalabiraawo nga bamuweereza ekkutiya 30 ng'omuntu eyazireeta yamutegeeza nti obutimba obusigalawo y'amanyi eky'okubukolera ye n'alowooza nti bw'abwetundira taba na musango.
Musaazi yaggaliddwa ku poliisi ya CPS wamu ne banne; Habomugisha , Musoke ne Ndagizimana ku musango oguli ku fayiro nnamba GEF 027/2021 nga n'emmotoka mwe babadde batambuliza obutimba yakwatiddwa nga abaserikale bwe banoonya omuntu Musaazi gw'alumiriza okumuleetera obutimba obususse kw'obwo bwe yasaba.
