GEOFFREY Kayemba Ssolo, maneja w'omuyimbi Rema Namakula era kittunzi w'abasambi b'omupiira amaze okwewandiisa okuvuganya ku kifo ky'omubaka wa Bukomansimbi South. Ye yaweereddwa kkaadi ya NUP mu kitundu ng'era akozesa kabonero ka Manvuuli.
Yatuuse ku ku kitebe kya Bukomansimbi Town Council we baamuwandiikidde ku ssaawa 3:00 ez'oku makya era gwe baatandikiddeko. Muky. Esther Asiimwe ye yakuliddemu omulimu guno.
Kayemba avuganya n'omubaka Deogratious Kiyingi owa DP ne Bashir Ssemakula owa NRM era olwamaze okumukwasa empapula ze n'ategeeza abawagizi be nti balina kukola kimu kya kumulonda ayingire palamenti ebisigadde babimulekere kubanga akolagana n'abantu bangi omuli abagagga, abazungu mu nsi z'ebweru n'abakulembeze ku mitendera egy'enjawulo omuli n'abanene ba NRM abagenda okumwanguyizaako okubasakira obuyambi okukulaakulanya ekitundu kyabwe n'abantu.
Yeeyamye okuyamba abavubuka okukulaakulanya ebitone byabwe n'okubatandikirawo pulojekiti ezibakulaakulanya kubanga alaba bonna abamuvuganya abakira.
