ABAYIMBI ne bannakatemba basabye Bannayuganda okubawagira n'okubakkiririzaamu mu kaweefube gwe baliko okuleeta enkyukakyuka n'okubakulaakulanya mu bintu eby'enjawulo.
Bannabitone bano okwabadde: Geoffrey Lutaaya, Mathias Walukagga, Dr. Hilderman, Patricko Mujuuka ne maneja wa Rema, Geoffrey Kayemba okwogera bino baabadde bagenda basisinkana abantu ku byalo eby'enjawulo okuli: Kiryamenvu, Kikondere, Batayunja, Buyoga, Kyabiri, Katanga mu Bukomansimbi South ku Lwokusatu.
Kayemba avuganya ku kifo ky'omubaka wa Bukomansimbi South yagambye nti nga maneja w'abayimbi ate kittunzi w'abasambi b'omupiira agenda kukolagana ne mikwano gye mu ggwanga n'ensi z'ebweru abasakire ssente wamu n'ebintu by'okwekulaakulanya wamu n'okukuza talanta z'abaana n'abavubuka naddala abayimbi, abasambi b'omupiira n'abawala abamanyi okubaka.
Yeeyambye n'okukozesa obukugu bw'alina okubasakira ssente mu Gavumenti eya wakkati okubakolera enguudo n'okutumbula ebyenjigiriza. Lutaaya yabasabye okukuuma emirembe n'obutakola ffujjo mu biseera by'okulonda wamu n'okwekuuma obulwadde bwa COVID 19.
