MAJ. Gen. Henry Tumukunde asuubizza okuliyirira abantu bonna abaagobwa ku ttaka lye bibira n'okukyusa ebyenjigiriza mu ggwanga.
Tumukunde avuganya ku Bwapulezidenti yasinzidde mu disitulikiti y'e Kakumiro, Kibaale ne Kagadi n'agamba nti alina entegeka y'okusasula abantu bonna abaagobwa ku ttaka ly'ebibira kwe baali baludde.
Yasuubizza n'okumalawo ekizibu ky'amasaza agaabula aga Buyaga ne Bugangaizi
kuba ensonga eno eremye okugonjoolwa Gavumenti zonna ezizze zibeera mu buyinza.
Kyokka olukuηηaana lwe yabadde ategese e Karuguuza baalumulemesezza, omubaka wa Pulezidenti, Deborah Mbabazi bwe yalugaanye ng'agamba nti baabadde tebagoberedde mateeka ga byabulamu agalwanyisa Corona.
Ebyenjigiriza yagambye nti alina entegeka y'okulaba ng'abikyusa omuntu abeere nga
w'amalira okusoma abeera asobola okwetandikirawo omulimu mu kifo ky'okunoonya okukozesebwa.
Tumukunde yatenderezza poliisi olw'okuba nga yabadde yeeyisizza mu ngeri y'obuvunaanyizibwa mu nkuηηαana zonna ze yakubye.
Maxwell Babyesiza yagambye nti ayagala Pulezidenti anaddako afeeyo okulwanyisa enguzi mu bakozi ba Gavumenti evuddeko okutunda emirimu. Justine Mbabazi
owe Mabaale yagambye nti ayagala omukulembeze anaafaayo ku byenjigiriza ng'azimba amasomero era gabeeremu ebikozesebwa eby'omulembe.
