NNANNYINI kkampuni ya bbaasi eya Teso Coach, Faustine Etilu 59, afudde ekirwadde kya Corona. Yafiiridde mu ddwaaliro e Mulago.
Jovan Odikor muto w'omugenzi yategeezezza nti omugenzi yatwaliddwa mu ddwaaliro e Soroti ng'embeera mbi kyokka nga tebalina kyuma kiyamba ku kussa kwe kumwongerayo e Mulago okufuna obujjanjabi gye yafiiridde.
Omugenzi abadde munnaNRM nga mu kalulu ka 2016 yassaawo ezimu ku bbaasi ze okunoonyeza Pulezidenti Museveni akalulu. Alese ebyobugagga bingi omuli amayumba n'ettaka mu Soroti, kkampuni y'ebyentambula endala eya Amuria Transporters ng'erimu kamunye ne loole.
