Bya Musasi Waffe
Okugezesa bbaasi esoose ekoleddwa mu Uganda kutandise. Bbaasi eno ekozesa mafuta g'ekika kya Dizero. Ruth Nasejje, akola ku by'amawulire mu kkampuni ya Kiira Motors Corporation (KMC) yategeezezza nti okugezesa bbaasi eno kwatandise ku Mmande mu kibangirizi ky'amakolero e Luweero gye baagikoledde.
Okugezesa kuno bagezaako okulaba nga buli kitundu kya bbaasi eno kikola bulungi nga tennaba kuteekebwa ku luguudo n'okusaabaza abantu. Bbaasi eno yazimbiddwa kkampuni bbiri okuli eya: Uganda automobile engineers and UPDF engineers nga bali wamu n'amakolero ga Luweero Industries Limited.
Bbaasi eno erimu n'ekinaabiro omuntu waayinza okunaabira, kkamera, firiigi n'ebirala ng'era erimu ebitundu bibiri okuli eky'abakungu n'abantu baabulijjo.
Source
