Ekizimbe kya Jenina Pub ekimanyiddwa ennyo mu Nansana kiri mu lusuubo, waliwo omugagga akyesimbyemu okukitunda.
Kino bakiwandiiseeko ebigambo ebiyita abaguzi naye ne bamulekwa nabo basitukiddemu okukirwanirira.
Ekizimbe kino kyali kya Ziba Nanyonga Hirji (Cham) eyali mukyala w'omugagga Kalim Hirji eyafa nga 2004 , nnyina w'abaana bano.
Abaana bano bayise abakulembeze b'ekitundu okubategeeza nga bwe bali mu bweraliikirivu olw' ekizimbe kino ekyabalekebwa nnyabwe nga bwe waliwo abakirambula nga baagala okukigula.
Baweze okufa n'omuntu anaagezaako okukitunda kubanga ebiwandiiko ebikakasa nti kyabwe babirina byonna era ensonga zino baazitwala dda ne mu kkooti okuyimiriza anageezaako okukigula.
