Kaijuka yagambye nti abantu abasinga abazimba amayumba bakwata mu nsawo zaabwe oba okwewola mu bbanka ne basabwa amagoba ag'obuwanana nga kyetaagisa gavumenti okussa ssente mu bajeti okuyamba ku Bannayuganda okwezimbira ku nju ezitegerekeka.
Kino kyaddiridde dayirekita w'ebyamayumba mu minisitule y'ebyettaka n'amayumba Dave Khayangayanga okutegeeza nti Bannayuganda abasoba mu bukadde kkumi basula mu biyumba bibi ebitasanidde kusuulwamu muntu
Bino baabitegeezezza mu lukung'ana lwa bannamawulire lwe batuuzizza okukuza olunaku lw'ebyamayumba olwabaddewo ku Mmande October 5.
Kaijuka yagambye nti gavumenti esobola okusaawo ensawo ey'okwewolwamu ssente ne zikomezebwawo oluvannyuma lw'ebbanga eddeneko nga temuli magoba obutafanana bikolebwa bbanka.
Dave Khayangayanga eyakikiridde minisita w'ebyettaka n'amayumba Cris Baryomunsi yagambye nti gavumenti efuna okulaba ng'erongoosa embeera za Bannayuganda mu nsula omuli n'okulwanyisa ekigoba bantu ku ttaka.
Yagambye nti waliwo pulogulaamu y'okulongoosa embeera z'abantu abasula mu bifo ebirimu omugotteko gw'obuyumba n'abantu mu bibuga (slums). Era yassaawo n'enkola esobozesa abagula emizigo ku bizimbe bya kalina okubanga n'ebyapa by'emizigo gyabwe.
Yagambye nti gavumenti erina n'enkola y'okuguza bamufuna mpola pulaani z'okuzimba amayumba ku bbeeyi ensaamusaamu. N'agamba nti abantu bwe bagenda mu kitongole ekivunaanyizibwa by'amayumba ku disitulikiti zaabwe oba ku kitebe kyakyo e Lugogo mu Kampala basobola okufuna pulaani zino.
