OMUYIMBI Jenniffer Fullfigure nga kati akola nga omuwabuzi wa pulezidenti Museveni asisinkanye abayimbi n'abavubuka b'e Mbarara okumalawo obukuubagano n'obutakkaanya obubaddewo nga buva ku kipande kye ng'ali ne Pulezidenti Museveni.
Kino kyaddiridde akatambi akasaasaanye ng'abavubuka abayimbi beemulugunya ku kipande kino ekyali kyateekebwa ku mayembe g'ente abantu abatannamanyika ng'ate ekifo kino bakiwa ekitiibwa era tewali kipande kyonna kyali kiteekeddwawo.
Baategeezezza nti nabo balina ebizibu ebibaluma kyokka balemeddwa okubituusa ewa Museveni ng'ate ne Full Figure tabayambye. Full Figure yabadde ne Ssaabavvulu Balaam Barugahare. Yagambye nti e Mbarara yagenzeeyo ng'omuwabuzi wa Pulezidenti ssi ng'omuyimbi era oluusi naye ensonga z'abayimbi tazimanya bwe baba tebamuwandiikidde n'abasaba okuyita mu mitendera mu kifo ky'okumulwanyisa.
Yabasabye abayimbi bano okubeera obumu nga bwe bakola ku nsonga zaabwe.
