ABALUNNYANJA ku mwalo gw'e Buwunga mu ggombolola y'e Mpatta mu disitulikiti
y'e Mukono baguddemu entiisa maama bw'akutte muwala we ow'emyaka 2 ne yeekasuka mu nnyanja bonna ne bafiirawo.
Sylvia Nakyejwe 26, abadde yaakasega ku mwalo guno oluvannyuma lw'okunoba
e Nansana mu Wakiso gy'abadde abeera, okusinziira ku batuuze bagamba nti, omugenzi baakomye kumulabako mu kiro ekyakeesezza ku Lwokuna ng'ali mu bbaala ng'atamidde. Bazzeemu okuwulira nga yesse.
Geoffrey Byakatonda omu ku batuuze ategeezezza ng'omugenzi bw'abadde yaakasega ku mwalo guno era nga tabadde na buzibu bwonna na muntu.
Stephen Alyobe nga ye ssentebe w'omwalo guno agambye nti, embeera eno ebadde tebatuukangako mu kitundu kyabwe n'asaba abakyala bonna ababeera bafunye obuzibu okugendanga ewa nnaabakyala okufuna okubudaabudibwa.
Poliisi okuva e Mpatta yazze n'etegeeragana n'abazadde b'omugenzi n'ebawa
emirambo okugenda okuziika.
