MUKYALA wa Kakooza Mutale afudde kibwatukira n'aleka aba famire n'emikwano mu kiyongobero.
Louise Nakawunde Mutale 70, omutuuze w'e Ssekannyonyi mu muluka gw'e Mpereerwe mu munisipaali y'e Kawempe yakubiddwa puleesa ku Mmande eyamuviiriddeko okufa, Nakawunde abadde musawo ng'abadde n'eddwaaliro erya Nang'anda Clinic e Ssekannyonyi ng'abadde Mukristaayo mu kkanisa ya S.t Luke Church Of Uganda e Mpereerwe.
Victoria Nabasumba 42, muwala wa Kakooza Mutale omukulu yategeezezza nti nnyaabwe yabadde mukyala mukulu ng'abadde n'abaana basatu.
Yayongeddeko nti aludde ng'alumizibwa ekirwadde ky'omutima ne puleesa eyamukubye ku Ssande ekiro nga kitaabwe abadde takyabeerewo ng'olwamaze okufa Mutale yasindise ambyulensi y'e Mulago n'etwala omulambo mu ggwanika.
Yagasseeko nti Nakawunde abadde musawo okumala emyaka 40 n'omusobyo.
Yaziikiddwa ku kyalo Ttanda mu Disitulikiti y'e Mityana.
Henry Ssejjemba, ssentebe wa LC Ssekannyonyi yategeezezza nti Nakawunde abadde mumalirivu mu buli ky'akola ng'abadde ajjanjaba abantu ng'okusinga baana okuva mu bitundu okuli Nammere, Ssekati, Kiteezi, Komamboga n'ebirala.
