OMUSERIKALE wa UPDF abafere gwe baalimba okuguza enju ne bamwefuulira ne bamukuba kalifoomu n'okumubbako obukadde 13 alaajanidde Gavumenti n'abazira kisa okumuyamba okufuna waabeera.
Sgt. Nasiimu Kyazike 70, nnamba RAV/026035 eyasangiddwa mu loogi emu ku Kaleerwe mu Ssebina Zooni yategeezezza nti yayingira amagye mu 1985 oluvannyuma lw'abazadde be okufa ng'akyali muto okutuusa lwe yagawumula mu 2016. Akasiimo ke baamuwa baakamubbako abasajja bwe baamulimbalimba nga bwe bagenda okumufunira ennyumba ewedde e Kawempe.
Kyokka mu mmotoka mwe baamuteeka mwe baamukubira kalifoomu ne bamubbako obukadde 13. Oluvannyuma baamusuula ku mabbali g'oluguudo nga takyategeera abantu we baamusanga ng'aboyaana ne bamutwala ku poliisi y'e Kawempe. Kyazike yategeezezza nti talina waasula nga n'olumu ssente z'okupangisa loogi zimubula ng'ate 200,000/- gye bamusasula asasula looni gye yeewola.
Yategeezezza nti ayagala okumuyamba ayinza okumufunira ku ssimu nnamba 0754516667 eya Ronald Ssebuggwawo. Yasabye bakama be mu magye bwe baba basobola bamuzzeeyo mu magye kubanga ensi emuzitooweredde.
