Abatakisi mukomye okusaasaanya ssente mu bintu ebitayamba - Minisita Kasolo

Abagoba ba takisi mu Kampala bakubiriziddwa okweyigiriza okutereka ssente balekeraawo okuzisasaanya mu bintu ebitabayamba omuli n'eky'okusondera bannaabwe embaga ezitaggwa.

Bino byogeddwa Minisita omubeezi owebyensimbi n'ebibiina by'obwegassi Kyeyune Haruna Kasolo bw'abadde asisinkanye abagoba ba takisi mu Kampala n'agamba nti kyennyamiza okulaba ng'abantu balemererwa okutereka ssente okubaako ekintu ekyawamu kye bagula kyokka ne badda mu kusonda ssente z'okukola embaga za mikwano gyabwe omuli n'okulya buli kintu ekibasala mu maaso ekintu ky'agambye nti balina okukikyusaamu.

 

Mu ngeri y'emu Kasolo asabye abatakisi okukomya okunyumyanga ku byobufuzi okuva ku makya ppaka budde kuziba olwensonga nti tebirina kye biyinza kubongerako.

Agambye nti obudde bwe bamala nga banyumya ku byobufuzi balina kubukozesa nga basala amagezi ku ngeri gye bayinza okwejja mu lunnabe w'obwavu, kijja kubayambako okugenda mu maaso olwo bafuuke abantu abeesiimisa.

 

Abasabye okwewala ebyobufuzi ebisiga obukyayi wabula beenyigire nnyo mu nteekateeka za gavumenti oz'okweggy mubwavu okuli ey'emyooga eyatandikibwawo Pulezidenti Museveni nga bayita mu kutereka.

Kasolo bano abalaze ebirungi ebiri mukuterekera awamu, nga singa bakikola , mu bbanga ttono nnyo kumpi buli muntu aba asobola okugula takisi eyiye.