ABOOLUGANDA lw'omukuumi wa Bobi Wine, Nobert Ariho eyakwatibwa baddukidde mu kkooti e Nakawa nga baagala ewalirize ekitongole kya SIU e Kireka kimuyimbule ne banne bwe baakwatibwa.
Nga bakulembeddwamu looya Anthony Wameli okusaba kuno baakututte mu kkooti y'omulamuzi Phionah Angura kyokka tasobodde kubayamba olw'okubeera n'olukiiko lw'abalamuzi lwabadde akubiriza n'abasaba baddeyo ku Lwokutaano.
Mu kiwandiiko kino bagamba nti Ariho, Ivan Ssentamu ne Moses Baraza baakwatibwa e Mbale ku ssaawa 1 ey'oku makya nga December 04, 2020. Baasooka kubasibira ku poliisi y'e Mbale gye baabajja ne batwalibwa ku poliisi y'e Tororo nayo gye bajjibwa ne batwalibwa e Kireka ku SIU nga n'okutuusa kati tebatwalibwanga mu kkooti. Wameli agamba nti kino kityoboola eddembe lyabwe eribaweebwa Ssemateeka kubanga kati ziweze essaawa 48 naye tebannaba kutwalibwa mu kkooti.
Wabula abooluganda lw'abantu bano baasoose kulowooza nti bagenda kubatwala mu kkooti y'e Nakawa gye beeyiye mu bungi kyokka ne batalabikako. Wameli yavumiridde ekya poliisi okutwala Ariho mu maka ge ne bagaaza nga balooya be tebaliiwo.
Waliwo ebigambibwa nti Ariho baamukwata ku byekuusa ku kacupa ka ttiyaggaasi akakubibwa Bobi Wine bwe yali e Kayunga ng'anoonya.
