EBIBIINA by'obwannakyewa ebirondoola eby'okulonda omuli ekya Citizens Coalition for Electoral Democracy in Uganda (CCEDU) ne National Initiative for Civic & Voter Education in Uganda (NICE, Uganda) byennyamidde olw'akakiiko k'ebyokulonda okulwawo okugaba obupapula obulaga abalonzi we balondera mu bitundu ebimu.
Akulira CCEDU, Charity Ahimbisibwe ne munne Chrispin Kaheru owa NICE bagamba nti akakiiko k'ebyokulonda kaategeezezza nti obupapula bwatuuse ku miruka era ne butandika
okugabibwa ku Ssande, nti kyokka mu bitundu ebimu nga e Mukono bwabadde tebunnatuuka.
Bino baabituuseeko nga basisinkanye abavubuka e Mukono abasoba 80 nga babakunga okwenyigira mu byokulonda nga beeyambisa omutimbagano mu kampeyini gye bayise ‘Omulembe gwa digito, Beera mu class.'
Eyaliko minisita akwasisa empisa n'obuntubulamu Maria Matembe yasinzidde wano
n'akuutira abavubuka okulonda abakulembeze abalina omuzinzi era n'ababuulirira nti bangi baakubagulirira n'ensimbi nti zo bazirye kyokka balonde abanaabagasa.
