Abalabirira bakateeyamba e Nalukolongo beeraliikirivu olw'omuwendo gw'abawaayo obuyambi eri bakateeyamba okukendeera olw'ekirwadde kya COvid-19.
Bino byageddwa Sr. Maria Mildred Abitegeka, omuwandiisi era omuwanika w'amaka ga Bakateyamba, bwe baababadde bakyazizza omubaka omulonde owa Lubaga South Aloysius Mukasa abadde agenzeeyo okudduukirira Bakateeyamba n'ebintu ebikozesebwa mu bulamu bwa bulijjo.
Mukasa yadduukiridde Bakateeyamba n'ebintu ebisoba mu bukadde 17, omwabadde; ekitanda eky'omulembe ekikozesebwa mu malwaliro nga kino kikola emirimu gyonna awatali kumenyeka ekibalirirwamu obukadde 15 ebidomola bya sabbuuni atta obuwuka ebisukka mu 20 n'okubawa ssente enkalu 700,000/- okubayambako ku bbanja ly'amasannyalaze.
Sr. Abitegeka yeebazizza Mukasa olw'omutima omugabi n'okufaayo eri Bakateeyamba, n'amusaba obutakoowa, abalambulenga buli kaseera kuba obwetaavu balina bungi.
Yamulaze okusoomoozebwa kwe bayitamu omuli; obuyambi bwe baali bafuna mu bantu okukendeera nga kati bakaluubirizibwa okutuukiriza ebyetaago by'abantu be balabirira, ebisale by'amasannyalaze gebakozesa okubeera waggulu ennyo nga mu mwezi ogumu bakozesa 500,000/-. Ku masannyalaze kwokka, ebyokulya n'okunywa nabyo balina bitono.
