POLIISI eyungudde ttiimu ya bambega okunoonyereza ku Ronald Ssegawa 22, eyaggyiddwamu enjala z'engalo nga kigambibwa nti yasooka kubuzibwawo wiiki bbiri eziyise.
Akulira okunoonyereza ku buzzi bw'emisango, AIGP Grace Akulo yategeezezza Bukedde eggulo nti, baasindise abakugu mu kunoonyereza okuzuula ekituufu. Ebifaananyi bya Ssegawa byasasaanye ng'ali mu mbeera mbi nga kigambibwa nti yatulugunyiziddwa. Yabadde n'ebisago ku mubiri ng'atunduddwaamu enjala.
Eggulo bambega baagenze mu bifo ebyenjawulo okuli eddwaaliro ly'e Lubaga, Ssegawa gy'ajjanjabirwa. Mu bye banoonyereza kuliko ani yatulugunya Ssegawa? Abafamire balumiriza nti yawambibwa kyokka era waliwo abavubuka babiri okuli Ssegawa ne Ronald Mabende abaakubwa e Kansanga mu Heritage Zooni nga kigambibwa nti baanyaga essimu ku muntu nga batambulira ku bodaboda.
Abatuuze baataayiza abavubuka ne babakuba nnyo ekyavaako Mabende okufa ate Ssegawa n'ayisibwa bubi okwali n'ababodaboda okumubetenta engalo. Poliisi eyagala okuzuula oba nga Ssegawa eyatungulwamu enjala ye Ssegawa y'omu gwe baakwatira mu bubbi e Kansanga. Ekirala oba omu ku abo abagambibwa okuwambibwa emmotoka "drone"?
Poliisi eggulo yafulumizza ekiwandiiko n'etegeeza nga bw'egaziyizza okunoonyereza ku bya Ssegawa. Omwogezi wa poliisi, Fred Enanga yategeezezza nti kyokka ebyakazuulwa biraga ng'ebimu ku bifaananyi ebyasaasaanyiziddwa ku Ssegawa kyabadde kigatte nga bakozesa kompyuta.
Ekifaananyi ekiraga omukono ogumenyese n'eggumba ne livaayo kya muwala Sandra Nelima ow'e Mbale mu Industrial Division eyaseerera n'agwa n'amenyeka emikono n'amagulu.
Ajjanjabirwa mu ddwaaliro Mbale era ekifaananyi gye kyaggyiddwa ne kikozesebwa aba NUP okulaga omukono ogwamenyese nti gwa Ssegawa. Ensimbi z'eddwaaliro zisasulwa ekibiina ky'obwannakyewa ekya Elite Youth of Uganda e Mbale. N'avumirira aba NUP okusasaanya obulimba nga bagenderera okukyayisa ebitongole ebikuuma ddembe.
Ekiwandiiko kya Enanga kyagambye nti Omuduumizi wa poliisi, Martins Okoth Ochora yalagidde okunoonyereza ku baserikale bonna abakola ebikwekweto bukya kalulu ka Pulezidenti kaggwa. N'agamba nti ebikwekweto bifuuza abeenyigira mu bikolwa by'obutujju okuli okukola effujjo.
Enanga yagambye nti abakulira ebitongole by'Ebyokwerinda bazzeemu okwekenneenya engeri gye bibadde bikolebwamu nga bwe balinda lipooti y'ekitongole ekinoonyereza ku buzzi bw'emisango.
Ttiimu ya bambega eyasindikiddwa okunoonyereza ku bya Ssegawa ekulemberwa akulira okunoonyereza ku misango gy'ettemu ayitibwa Monday Johnson.
Kigambibwa nti ku Lwokutaano nga January 29, 2021 ku ssaawa nga bbiri ez'ekiro mu Heritage zooni e Kansanga, waliwo abasajja babiri abaali batambulira ku boda boda UEH 768K Bajaj Boxer ne banyakula essimu.
Christine Mbajja, ssentebe wa Heritage yagambye nti, omutuuze gwe baanyakulako essimu yakwata pikipiki nga bagezaako okudduka ne bagwa wansi n'egwira eyali avuga abatuuze n'aba bodaboda we baabakwatira ne batandika okubakuba.
Kigambibwa nti, abaali ku pikipiki kwaliko Ronald Mabenda eyali avuga ne Ronald Ssegawa eyali emabega era ono ye yanyakula essimu.
Mbajja agamba nti, Mabenda abatuuze baamukuba n'afiirawo era bagenda okumuyita, yasanga Ssegawa akyalimu obulamu n'ayimiriza abaali batwalira amateeka mu ngalo.
Poliisi eyagala kukakasa oba Ssegawa eyakwatibwa mu bubbi ye Ssegawa y'omu eyaggyibwamu enjala.
