Ekiragiro kya kkooti kyongedde okutabula famire ya Kafeero

Bya JOSEPHAT SSEGUYA
EKIRAGIRO kya kkooti kyongedde okutabula famire ya Paulo Kafeero! Abaana n'abooluganda abeenyigira mu kutunda ebintu bye nga tebalina buyinza ne be baabiguza basattira olw'ekiragiro kya kkooti ekigamba nti, abaatunda n'abaagula bonna baali bakyamu.

Martin Kafeero omwana wa Kafeero eyawaaba omusango.

Omulamuzi Joseph Murangira owa kkooti y'ebya famire e Makindye okusalawo ku Mmande nti, abaagula eby'omuyimbi oyo ng'afudde mu May wa 2007 tebaabigula mu mateeka kubanga abaabitunda tebaalina bbaluwa (letters of Administration) ekkiriza muntu kutunda eby'omufu.

Thomas Kafeero Schwarznegger.

Kafeero yaleka abaana 15 kyokka abaana 10 banenya bannaabwe bana okwekobaana ne batunda ebintu bya kitaabwe nga bo babakebezza omusaayi ogwalaga nti Kafeero si y'abazaala era baaguwakanya. Omwana omu Chosen Prince Paul Kafeero yagaana okumugyako omusaayi n'ebyokugenda mu kkooti ng'agamba nti ye akimanyi Kafeero ye kitaawe.

Abaawaaba kuliko; Martin Kafeero eyakulembera, John Mark Kafeero, Tony Kafeero, Cate Nalukwago, Stella Namuli, Tracy Namuddu, Aron Kafeero, Birungi Namugerwa, Bridget Nalukwago ne Joan Mirembe Nantongo. Ate abaawaabirwa kuliko; Elizabeth Nagawa, Thomas Kafeero Schwarzenegger, Benedict Kafeero (Dube) ne Simon Kafeero.