NEWANKUBADDE nga corona akosezza nnyo ekisaawe ky'okuyimba mu ggwanga, abayimbi abamu tebasuuliridde bawagizi baabwe era basigadde babayiiyiza wadde nga bakyali ku muggalo.
Omu ku bayimbi abatatudde ye Vivian Tendo gwe baakazaako erya ‘Hajat wa Hajji'. Vivian Tendo okuva mu ‘Route Music', oluyimba lw'asabuukuludde luyitibwa ‘Timango' nga mu luyimba luno agamba nti essanyu alifuna omwagalwa we waali era amulinda buli lukya amuleetere essanyu anti y'ansinga obulungi, nga luli mu nnimi ezisukka mu bbiri.
Tendo agamba nti, abawagizi be lujja kubanyumira era lwongere okutumbula omukwano gwe balina eri abaagalwa baabwe.
Maneja wa Vivian Tendo amanyiddwa nga Yese Oman Rafik, agamba nti omuziki mu Corona tegubadde mwangu olwokuba ebivvulu byaggalwa naye ate abawagizi baabwe tebayinza kubasuulirira kye bavudde babayiiyiza ebipya ebivvulu bigende okuggulwa ng'abawagizi balina kye babawa.
