Bya JOSEPH MAKUMBI BAZADDE ba Ssegawa amaziga gaabayiseemu nga tebakkiriza nti gwe balaba ye mwana waabwe! Eyawambibwa nga talina kisago kyonna, baagenze okumuzuula ng'enjala z'engalo baazikuddemu, omukono ogumu gumenyeddwa nga n'ebisago by'alina ku mubiri biri buli wamu.
Engalo ze baakuddemu enjala za mukono ogwa kkono era abantu be baategeezezza nti bateebereza nti abaamuwamba baakozesa magalo okuziggyamu. Olwala lw'engalo eddirira ensajja lwaviiramu ddala n'engalo n'ekutukako akatundu ate olwala lw'engalo eya wakati nalwo baalukuulamu n'asigaza kikuggu.
Omukono ogwa ddyo baagumenyera enfunda bbiri; mu ssaabiro (ku kibegabega) ne mu kiseke (ekibatu we kikoma) era abasawo baabadde bagezaako okuguyunga mu bifo ebyo ebibiri. Ronald Ssegawa 22, yazze engulu ng'ali mu ggwanika e Mulago gye yabadde asuuliddwa abaamuwamba wiiki bbiri eziyise.
Baamuwambira Bwaise mu Kampala era babadde bamukuumira mu kifo ekitannamanyibwa. Amaaso ga Ssegawa baagakuba ne gazimba era yabadde tasobola kugabikkula nga n'omukka yabadde abaka mubake.
BAMUSUDDE KU GGWANIKA NGA BALOWOOZA MUFU Kiteeberezebwa nti Ssegawa yasoose kuzirika ekyalowoozesezza abaamuwamba nti yabadde afudde era kwe kumutwala ne bamusuula ku ggwanika e Mulago. Abaawamba Ssegawa baamutulugunya nnyo era kiteeberezebwa nti obulamu bwatandise mpola okuseebengerera olw'ebisago ebyamutuusiddwaako, omukka ne gugenda ne balowooza nti afudde.
Kigambibwa nti baamuzinze mu kiveera ne bamusuula ku ggwanika ku Lwomukaaga akawungeezi era ekiveera mwe baabadde bamuzinze kyasigadde ku ggwanika nga kizuuliddwa nti akyassa, olwo ne bamutwala kipayoppayo mu ddwaaliro e Mulago mu kasenge k'abayi okujjanjabwa.
Kigambibwa nti abaamututte mu ggwanika baabadde mu mmotoka eyabadde ebikkiddwa ennamba era abaagibaddemu nti baabadde bambadde obukookolo. "Bwe baamaze okusuulawo omuntu eyabadde azingiddwa mu kiveera, ne basimbula emmotoka ne bagenda," Omu ku bakola e Mulago eyabaddewo mu kiro ky'Olwomukaaga bwe yategeezezza Bukedde eggulo.
ENGERI GYE BAAWAMBA SSEGAWA Ssegawa omutuuze w'omu zzooni ya Bishop Mukwaya mu muluka gwa Bwaise I mu Munisipaali y'e Kawempe, yawambibwa wiiki bbiri eziyise abasajja abaali batambulira mu mmotoka ekika kya Toyota Drone etaaliko nnamba.
Nusifa Nakato eyawangudde ekya kkansala wa Kawempe North I yagambye nti, Ssegawa baamuwambira ku Avis e Bwaise era wadde yaliwo ne banne, baawambawo ye yekka ne bamutwala. Baasooka kumunoonyeza ku poliisi nga taliiyo era oluvannyuma ne banoonyezaako ne ku ggwanika e Mulago wabula ne balemwa okumuzuula.
Nakato yagambye nti, ku Lwomukaaga waliwo omukozi mu ggwanika e Mulago eyabakubidde essimu n'abagamba nti, waliwo omuntu gwe baabadde batutteyo afaanana owaabwe gwe baludde nga banoonya. Omukozi ono yeesigamye ku kifaananyi mikwano gya Ssegawa kye baaleka e Mulago nga bataddeko n'ennamba y'essimu nga basabye abakolayo okubakubirako singa bafuna amawulire gonna agakwata ku Ssegawa.
"Omubiri gwe gwonna balinga abaafuna ekyuma ne bakyokya ne bagenda nga bakimukubisa kubanga alina ebiwundu ku buli kitundu kya mubiri," Nakato bwe yategeezezza. Ssegawa y'omu ku bantu abazze bawambibwa okwetoloola eggwanga mu mmotoka kika kya Toyota Drone ezitaliiko nnamba.
Wiiki ewedde, Minisita w'ensonga z'omunda, Gen. Jeje Odongo yategeezezza palamenti nti, abantu abaabuzibwawo bali 44 nga ku bano 13 baakwatibwa ku misango egitali gimu abamu ne batwalibwa mu kkooti ate 31, tebabamanyiiko mayitire.
SSEGAWA AKYALI MU MBEERA MBI: Nakato yagambye nti, okuva lwe baazudde Ssegawa, waliwo abantu bangi ababakubira amasimu nga beefudde abaagala okumuwa obuyambi n'ategeeza nti, baafunye okutya nti mwandibaamu abantu ab'omutima omubi nga baagala kumumaliriza.
Yagasseeko nti, baafunye omuntu eyabawadde obuyambi ne basaba abasawo mu ddwaaliro e Mulago Ssegawa ne bamuggyayo ne bamutwala mu ddwaliro eddala eryekusifu. Ssegawa, azaalwa Bugerere mu disitulikiti y'e Kayunga, nnyina ye Margret Musuya era eyo gye yava okuyingira Kampala.
Abazadde eggulo baagenze mu ddwaaliro ne bagwawo ekigwo nga balabye embeera omwana waabwe mw'ali. Eky'okumukuulamu enjala kye kyasinze okubakuba ewala. Nakato agamba nti bateebereza nti okuwambibwa kwa Ssegawa kulina akakwate ku byobufuzi. Yannyonyodde nti Ssegawa y'omu ku bavubuka abatambulira ku bupiira ‘skates' abapangisibwa okukola "obubadi" ku bivvulu n'okukulembera bannabyabufuzi abayisa ebivvulu okusobola okusika abantu.
Yalambuludde nti mu November w'omwaka oguwedde ng'aba NRM bayisa ebivvulu n'okutongoza kkampeyini za nju ku nju, Ssegawa y'omu ku baapangisibwa okukola obubadi ng'ali ku ‘skates' okwetoloola ekibuga nga yeesiize langi enzirugavu, n'eya kyenvu n'emmyufu ezikola bendera ya Uganda.
Bwe yatuuka mu kifo ekimu, yasanga owa bodaboda eyamukwata akatambi ku ssimu n'agamba nti, "Anti mwana eky'okulonda mukimanyi bino byonna bye tulimu kawani, tulonda Bobi Wine Kyagulanyi Ssentamu." Akatambi ako kaatambuzibwa nnyo ku mikutu gya yintaneti era mikwano gya Ssegawa beebuuza oba waliwo akakwate wakati w'abaamuwamba n'akatambi ako.
Nakato yagambye nti kyennyamiza okuba ng'eby'okutulugunya ebizze bikolebwa ku bantu abagambibwa okuba abatujju n'abamenyi b'amateeka b'omutawaana, nga kati bikolebwa ku bannabyabufuzi n'abawagizi baabwe.
POLIISI ENOONYEREZA KU BAAWAMBA SSEGAWA: Omwogezi wa poliisi mu Kampala n'emiriraano, Patrick Onyango bwe yatuukiriddwa okubaako ky'annyonnyola ku bya Ssegawa yagambye nti, Minisita w'ensonga z'omunda yabadde ayogedde mu palamenti wiiki ewedde ku by'abantu abaawambibwa nti era baazinoonyerezaako nga poliisi okuzuula abali emabega w'okuwamba Ssegawa n'abantu abalala be batannazuula.
Yagambye ku nsonga ya Ssegawa, bagenda kwesigama nnyo ku kkamera za poliisi eziri e Mulago okwetegereza emmotoka eyasudde Ssegawa ku ggwanika e Mulago n'abantu abaagibaddemu.
