MINISITA w'ensonga z'omunda Jeje Odongo akuutidde Bannakasokoso ne Kiganda okuva ku byobufuzi baddemu bakole beekulaakulanye kubanga eggwanga lyetaaga abantu abakola okusobola okukulaakulana.
Bino yabyogeredde Kireka D mu Kiganda bwe yabadde aggulawo eddwaaliro eriri mu Kireka D LC1 Kiganda -Kasokoso erya Community Health Center II, erisangibwa mu kitundu ekyo.
Omukolo gwakulembeddwa ssentebe w'ekyalo kino, William Kibira, eyeebazizza UPDF olw'eddwaaliro lye babawadde mu kitundu , n'ategeeza nti beesonda ng'abantu b'ekitundu okulaba nga bafuna ettaka ly'okuzimbako eddwaliro mu 2019, ne bazimbako okutuuka mu madirisa, okutuusa UPDF bwe yavuddeyo ne badduukirira ne bazimba ekizimbe okutuusa lwe kyawedde.
Yategeezezza nti kino kyakulabirako kinene eri eggwanga olw'amagye ga UPDF okuzimba eddwaaliro ly'ekyalo okuyamba abantu era kyoleka enkwatagana amagye gye galina n'abantu baabulijjo. ‘‘Eddwaaliro lino likyali kizimbe, bwe muba temuli bikozesebwa, teribeera ddwaaliro noolwekyo hhenda kufuba okulaba nga nteekamu ebikozesebwa ng'eddagala n'ebintu ebirala ebyetaagisa eddwaliro okufuuka eddwaaliro nga mpita mu minisita w'ebyobulamu,'' Minisita Jeje Odongo bwe yategeezezza.
RDC w'e Wakiso, Justine Mbabazi n'omumyuka we owa Kira, Isaac Kawonawo Ndugu baasanyukidde omulimu guno ogukoleddwa UPDF ne ssentebe w'ekyalo William Kibira eyabalung'amya, ssaako ssentebe wa NRM ku kyalo kino Umar Muyanja eyakunga Bannakasokoso okuwagira Pulezidenti Museveni mu kalulu.
