Omubaka omulonde owa Lubaga South, Aloysius Mukasa adduukiridde bakateeyamba e Nalukolongo. Ono yakyadde mu maka gano okutwalayo ebintu ebiwerako.
Mukasa adduukiridde Bakateyamba n'ebintu ebibalirirwamu obukadde bw'ensimbi 17, omwabadde; ekitanda eky'omulembe ekikozesebwa mu malwaliro nga kino kibalirirwamu obukadde 15 nga kikola emirimu omuli okukyusa omulwadde okumuzza buli ludda lw'oba oyagadde, yabawadde ebidomola bya sabbuuni atta obuwuka ebisukka mu 20 ne ssente enkalu 700,000/- okubayambako ku amasannyalaze.
Sr. Maria Mildred Abitegeka yategeezezza nti beeraliikirivu olw'omuwendo gw'abawaayo obuyambi okukendeera olw'ekirwadde kya Corona kyokka ne yeebaza Mukasa olw'omutima omugabi n'okufaayo eri Bakateeyamba n'amusaba obutakoowa kubalambula.
Yategeezezza nti obuyambi bwe baali bafuna mu bantu bwakendeera nga kati bakaluubirizibwa okutuukiriza ebyetaago by'abantu be balabirira.
Sr. Abitegeka yattottoledde Mukasa okusoomoozebwa kwebayitamu omuli; obuyambi bwe baali bafuna mu bantu okukendeera nga kati bakaluubirizibwa okutuukiriza ebyetaago by'abantu be balabirira, ebisale by'amasannyalaze ge bakozesa okubeera waggulu nga mu mwezi ogumu bakozesa 500,000/- ku masannyalaze gokka, eby'okulya n'okunywa nabyo bitono.
Mukasa yasuubizza okwongera okuwaayo n'akunga ne Bannayuganda abalala okuwaayo obuyambi.
Frederick Robert Kalule, looya eyatambudde ne Mukasa yasabye gavumenti okuteekawo ebifo bwe biti okwetooloola eggwanga nga biddukanyizibwa gavumenti. Baategeezeddwa nti mu bakateeyamba mulimu n'ab'amawanga amalala okuli Abasudan, Bannakenya nga balina n'Omuzungu n'abalala.
