Okusinziira ku lipooti ya Kaliisoliiso wa Gavumenti eyanjuliddwa sipiika wa Palamenti Rebecca Kadaga olwaleero, ensimbi 1,151,373,448/- ze zaanunulwa mu mpeke ate obuwumbi 5,360,000,000/- ze zaava mu kuwamba eby'obugagga by'abalyake.
George Bamugemereire amyuka Kaliisoliiso wa gavumenti nga y'ayanjulidde sipiika lipooti eno, ategeezezza nti omwaka gw'ebyensimbi oguwedde bafunye emisango 1,707 egyekuusa ku buli bw'enguzi nga ku gino basobodde okunoonyerezaako emisango 1,153 ne bagiggusa.
Abakozi ba gavumenti 280, okuva mu Minisitule ez'enjawulo n'ebitongole bya gavumenti be baweereddwa ebibonerezo olw'okwenyigira mu bukenuzi ate abalala 26 bakyawerennemba na misango.
Wabula Bamugemereire anokoddeyo ebibasoomooza mu mulimu gw'okulwanyisa enguzi omuli ebitongole bya gavumenti okugaana okuteeka mu nkola ebiragiro bya Kaliisoliiso ku bantu ababa basangiddwa mu bubbi, ebbula ly'ensimbi ekibalemesa okutambula eng'endo empanvu okusobola okukola okunoonyereza, abakozi okubeera abatono n'ebitongole ebimu obutakuuma biwandiiko.
Basabye sipiika abayambeko Palamenti eyanguwe okuyisa ebbago lya "Leadership Code Amendment Bill" ly'agambye nti lya kubanguyizaako mu mirimu gyabwe.
