OMUZIBIZI wa Arsenal, William Saliba agugumbudde omutendesi we Mikel Arteta olw'obutamuwa budde kweranako kulaga ky'alinawo.
Omufalansa Saliba, Arteta yamwazise mu Nice kyokka okuva lwe baamugula mu Saint-Ettienne ku bukadde bwa pawundi 27, Arsenal temuwaddeeyo mupiira gwonna ku ttiimu enkulu, ekyamumalamu amaanyi.
Okuva omuzannyi ono lwe yaddayo e Bufalansa ku bbanja, omutindo gwe gulinnye bya nsusso era ye yawangudde eky'obuzannyi bwa Nice obw'omwezi gwa January.
Kino kivuddeko omuzannyi ono okwogerera Arteta amafuukuule ng'agamba nti teyamuwa budde bumala kulaga ky'alinawo era singa omutendesi ono yamukkiririzaamu, yandibadde alina ennamba esooka mu Arsenal.
"Nalinda omutendesi ampe emikisa nzannye omupiira kyokka tekyaliwo kyokka ogwo gwe mupiira era ebyo bibaawo," Saliba bwe yagambye.
Yagasseeko nti, "Kati ndi musanyufu kuba nfuna omukisa okuzannya buli mupiira era nnina essuubi nti ng'enda kweyongerako.
Okuva lwe yava mu Arsenal, Saliba yaakazannya emipiira musanvu ne bawangulako ebiri ne bamalako emipiira emirala ebiri nga tebateebeddwaamu.
