KAWEEFUBE w'okuwangula ekikopo kya Premier sizoni ejja, ManU emutadde mu kukansa muzibizi anaayongera okuggumiza ekisenge kyayo.
Omutendesi wa ManU, Ole Gunnar Solskjaer atunuulidde Ibrahim Konate owa RB Leipzig gw'ayagala okukansa mu katale akajja ayongere amaanyi mu kisenge mu kaweefube waabwe okuggumiza ttiimu ye.
Everton yavudde mabega okulemagana ne batabani ba Solskjaer ggoolo 3-3 mu gwa Premier ekyayongedde okulaga nga ManU bw'eterina kisenge kinywevu.
Kino abatunuulizi bangi kye bagamba nti kye kigenda okusubya ManU ekikopo kya sizoni eno.
Omuzannyi ono ow'emyaka 21, Chelsea ne Liverpool nazo zimutunuulidde okumuleeta bongere amaanyi mu ttiimu zaabwe.
Wadde nga omuzannyi ono amaze akaseera ng'atawaanyizibwa obuvune, emipiira 12 gye yaakazannya sizoni eno amatizza, ekivuddeko ttiimu ez'enjawulo okumusongako okumugula.
Omuzibizi wa RB Leipzig omulala, Dayot Upamecano ye yasooka okukwata ttiimu za Bulaaya omubabiro kyokka bakama be ne bagaana okumutunda.
Kigambibwa nti bw'anaaba waakutundibwa, ttiimu eteeweze bukadde bwa pawundi 38, tebajja kugiwuliriza.
