ABAAWANGUDDE ebirabo by'akazannyo ka Gabula Ssekukkulu ak'olupapula lwa Bukedde akaakubiddwa nga December 21, banona leero ebirabo byabwe ku kitebe ekikulu ekya Vision Group e Lugogo.
Oluvannyuma lw'okufulumya olukalala lwa bannamukisa abaawangudde mu Bukedde w'eggulo (Lwakubiri), Bukedde ayita abo bonna abaawangudde era abaakubiddwa essimu bajje bafune ebyassava byabwe leero ku Lwokusatu nga December 23,
ng'ebirabo byakugabwa okuva ku ssaawa nnya ez'oku makya (4:00).
Omuwanguzi olina okujja n'essimu yo kwe baakukubidde ne densite ekwogerako kyanguyize abagaba ebirabo bino. Omuwanguzi olina okujja ng'oyambadde masiki ng'etteeka!
NE BUKEDDE FA MA EGABULA LEERO
Simon Maseruka (Simo omunene w'ekibuga) ku lwa Bukedde Fa Ma Embuutikizi yagambye nti abantu 20 abaawangulidde ku leediyo eno nabo baakufuna ebirabo byabwe leero ku ssaawa nnya.
BUKEDDE TV AGABUDDE EBYAYO
Abantu 30 abaawangula ebirabo bya Gabula Ssekukkulu nga bayita mu kukuba essimu ku Bukedde TV baakwasiddwa buli omu ettu lye erya Ssekukkulu.
Bino byabaddewo eggulo ku Lwokubiri ku makya ng'abawanguzi baasoose kukwasibwa buli omu ettu okuva mu kkampuni ya Prestige Margarine olwo ne boolekera Mega Standard Supermarket ne babawa vvooca ya 100,000/- okweroboza bye baagala.
Maneja wa Mega Standard Supermarket, Francis Akankwasa yagambye nti aba Mega baasalawo okutambulanga ne Bukedde mu buli ky'ategeka kubanga naye abawagira n'okulanga ebyamaguzi byabwe.
Dorah Naamala eyakulembeddemu okugaba ebirabo bino yeebazizza nnyo kkampuni ezaataddemu ssente n'abawagizi ba Bukedde TV era n'abakubiriza bulijjo okugyekuumirako.
Gabula Ssekukkulu ow'omwaka guno awagiddwa kkampuni etunda enkoko eya UgaChick, Mary and Jesus Wines, Mega Standard supermarket ne Prestige Margarine.
