Bataddewo akakiiko ku bya Muzaata

ABAKUZA ne mikwano gya Sheikh Nuhu Muzaata bataddewo akakiiko k'abantu mwenda okukung'aanya ebyobugagga by'omugenzi n'okukola ku byonna okuli okutegeka Edduwa erisomwa oluvannyuma lw'ennaku 40.

Nnamwandu wa Muzaata omukulu, Hajati Amina Bugirita.

Akakiiko kaliko mukulu wa Muzaata ayitibwa Musa Kaboyo. Kalondeddwa wakati mu lutalo olusituse mu famire. Eyali mukazi we Amina Bugirita yayingiddewo ng'agamba nti ennyumba ya Muzaata e Kawempe mu Keti-Falawo yagiteekako ssente okugizimba eteekwa kuba y'abaana be Hamidah Nassozi ne Amjadi Ssozi.

Nnamwandu wa Muzaata omuto, Kuruthum.

Ate mukazi we Kuruthum Nabunya agamba nti ye mukazi wa Muzaata amanyiddwa mu mateeka. Bamaze ne Muzaata emyaka 20 ne bazaala omwana Anwar Ssessanga ow'emyaka 12. Ssessanga abadde asula ne Muzaata mu kisenge. Ekirala ebintu bingi mu nju ebikozesebwa awaka ye Nabunya ye yabigula. Ekirala wadde yatabukamu ne Muzaata, ensonga zaabwe zaakolwako bazadde baabwe ne Bamaseeka era zibadde ziwedde.

Ekikaluubirizza Nabunya kwe kuba nga Muzaata bwe yafudde, Amina yayanguye okugenda awaka ate Nabunya n'agenda ku ddwaaliro lya IHK, Muzaata gye yafiiridde. Nabunya we yatuukidde e Kawempe ng'ekisenge kiggaddwa. Muzaata yafudde ku Lwokutaano n'aziikibwa e Kigogwa ku lw'e Bombo ku Lwomukaaga.

Omu ku baana ba Muzaata, Anwar Ssessanga.

Eggulo ku makya, olukiiko lwatudde ne lussaawo akakiiko. Muganda wa Muzaata, Kaboyo yategeezezza olukiiko lw'abakuza nti alina ekiraamo kya Muzaata wadde nga tekyabaddewo mu kiseera ekyo. Abamu ku baabadde mu lukiiko Hajji Hasib Takuba. Akakiiko kaliko Hajji Badru Kakembo, Sheikh Ismail, Hajat Sarah Nakandi, Hajat Sharifah Nabitalo , Hajji Nurudin Nkata , Hajji Musa Kakembo ne Hajat Fatuma Nassanga.

Kyategeezeddwa nti ng'olukiiko terunnabaawo, abamu ku bafamire okuli Looya Fahad Matovu owa Nakacwa & Co. Advocates (ono Muzaata ye yamuweerera), Musa Kakembo, Sheikh Yassin ne Hajat Nabitalo bagguddewo ekisenge kya Muzaata okulaba ebiriyo. Ekimu ku byavuddeko okuggulawo ekisenge kwe kulaba ebyapa ebigambibwa okusoba mu 30, okuli ebya Muzaata n'ebirala ebyamuteresebwa abantu abamwesiga.

Bukedde bwe yabuuzizza Kaboyo yagambye nti ensonga zaabwe za famire. Bajja kuzimaliriza. Ebigenda okukolwako akakiiko kuliko okuwandiika n'okukung'aanya obugagga bwa Muzaata; okuzuula oba eriyo abamubanja naye b'abadde abanja; okutegeka Edduwa y'ennaku 40.

Omugenzi Sheikh Muzaata.

Mu Busiraamu omuntu asomerwa Edduwa oluvannyuma lw'ennaku 40 okuva lw'afudde. Kyokka eya Muzaata etuukira ku lunaku lw'okulonda kwa 2021. Obumu ku buvunaanyizibwa bw'akakiiko kano kwe kutuukirira Bamaseeka, Supreme Mufti Sheikh Kasule Ndirangwa n'Omuloangira Kassim Nakibinge okubategeeza ebya Edduwa n'okuwabula ku biteekwa okukolebwa. 

EKIRI EWA MUZAATA

Ku geeti kuliko omukuumi. Waliwo omusajja eyakwatiddwa mu kimu ku bisenge mwe baaterese ebintu bya Nabunya n'ebya mutabani we Ssessanga. Baabadde baagala kumutwala ku poliisi kyokka abamu ne bamuwolereza n'asonyiyibwa.

Nnamwandu Nabunya yabadde n'abooluganda lwe mu ffumbiro ly'ebweru. Nabunya by'agamba: ekinnuma sikkirizibwa kuyingira mu kisenge. N'omwana Ssessanga takkiriziddwa 

ate ng'abadde asula ne kitaawe mu kisenge.

Ekirala omusajja yasangiddwa ng'atinkuula ebintu mu kisenge omuli ebintu byange. Kyokka omusajja alekeddwa nga tatwaliddwa wadde ku poliisi okuzuula ekigendererwa kye. Tetwetaaga kusika muguwa nga tuli mu kukungubaga. Ekyetaagisa bwenkanya. Nneewuunya abantu okuyingira mu kisenge kyange bawandiike ebintu nga nange wendi kyokka ne batampa mukisa kubalaga.

Mmaze ne Muzaata emyaka 20. Mmanyi bingi ebimukwatako. Mu bbanga lye mmaze nga nkola, nnina bingi bye nguze nga byange. Ebyo banaabyawula batya nga sibibalaze? Hajati Amina naye yabaddewo mu lumbe. Kyokka Bukedde teyasobodde kwogera naye.

Kigambibwa nti abooludda lwa Amina baalaze nti yakola nnyo okuzimba ennyumba era ye n'abaana be bagirinako omugabo.