OMULAMUZI w'eddaala erisooka mu kkooti e Butalangu mu Nakaseke, Milly Nankya agobye omusango gw'okukuba olukuηηaana olumenya amateeka ogubadde guvunaanibwa omubaka wa Nakaseke South, Paul Luttamaguzi Semakula n'abawagizi be 22 oluvannyuma lw'oludda oluwaabi okubulwa ababalumiriza.
Nankya yali awadde olwa November 2 okutandika okuwulira omusango guno kyokka okuva olwo oludda oluwaabi lwalemwa okuleeta abajulizi omwali omuduumizi
wa poliisi mu Nakaseke, Sulaiti Kitaka n'abapoliisi abalala babiri.
Ku Lwokuna omuwaabi wa gavumenti Angello Wasswa yazzeemu okutegeeza kkooti ng'abajulizi bwe bataalabiseeko era wano munnamateeka Richard Lumu we
yasabidde omusango gugobwe kuba omubaka Luttamaguzi asusse okuleppusibwa mu kkooti n'amalirwa ebiseera by'okuyigga obululu.
Omulamuzi Nankya yasazeewo okugoba omusango oguvunaanibwa
abantu bano n'alagira n'ensimbi z'okubeeyimirira ze baasasula zibaddizibwe. Luttamaguzi
n'abawagizi be 22 baakwatibwa nga August 28 omwaka guno.
Luttamaguzi yategeezezza nti emisango gibaddemu ebyobufuzi.
