PULEZIDENTI Yoweri Museveni alabude abaleeta omuzannyo mu byobufuzi bakikomye, banoonye ebirala eby'okuzannyirako.
Yagambye nti ebyobufuzi bw'obizannyiramu kibeera kyangu okusuula eggwanga mu matigga. Yagambye nti abagezaako okukuma omuliro mu bantu baakukyejjusa n'abawa amagezi okwogerezeganya obulungi n'abantu bwe babeera baagala babalonde.
"Abaagala babalonde bababuulire bye bagenda okubakolera okusinga okubatiisatiisa n'okubeewerera." Yabyogedde atandika okunoonya akalulu mu bitundu by'e Mubende eggulo ku Mmande gye yasisinkanidde abakulembeze ba NRM ku mitendera
egy'enjawulo. Ensisinkano yabadde ku Mayor's Gardens.
Yasisinkanye abakulembeze ba disitulikiti okuli: Kassanda, Mityana, Kiboga, Kyankwanzi ne Mubende.
Yasoose kutongoza luguudo lwa Mubende - Kakumiro - Kibaale - Kagadi oluliko kkirommita 107.
Pulezidenti yagambye nti guno gwe mulundi ogusookedde ddala Uganda okubeeramu
emirembe mu buli kasonda ka ggwanga n'asaba abantu okwewala okutabiikiriza ebyeddiini n'amawanga mu byobufuzi.
Yategeezezza nga gavumenti ya NRM bw'etadde ettoffaali eddene ku nkulaakulana y'eggwanga omuli okukulembeza okukola ku byetaago by'abantu, okugatta Bannayuganda, okusikiriza bamusigansimbi ne kikendeeza ebbula ly'emirimu.
Bannaddiini abaakulembedwa Bishop Grace Karuhanga baasabide Pulezidenti Museveni obuwanguzi era ne bageraageranya obufuzi bwe ku bwa Daudi eyawangula Goliyaasi n'asobola okubeera ku Bwakabaka bwa Yisirayiri okumala ebbanga lya myaka 40 nga Yisirayiri erimu emirembe.
Nampala wa gavumenti Ruth Nankabirwa ate nga ye mubaka omukazi owa disitulikiti ye Kiboga yasoose kujjukiza Bannayuganda obutakoowa kwambala masiki n'okuteeka mu nkola ebiragiro byonna okutangira ekirwadde kya corona.
Yakuutide aba NRM okuggyayo n'ag'omu buto nga banoonyeza Museveni akalulu olwo obuwanguzi bubabeere mu ttaano.
Yagambye nti yadde Robert Sentamu Kyagulanyi (Bobi wine) ava mu Buganda era nga bava mu lunyiriri lwe lumu mu kika ky'Embogo, Nankabirwa yagambye tagenda kukombya Kyagulanyi ku kalulu kuba ye talonda mawanga wabula obusozi ate nga abulaba mu Museveni.
Omubaka omukazi owa Mityana, Judith Nabakooba yeebazizza Museveni olw'ebirungi by'akoledde ab'e Mityana omuli okubazimbira enguudo, amasomero, okubatuusaako amazzi amayonjo n'amasannyalaze.
