Abakadde bajjumbidde okulonda mu Kawempe

BYA MOSES LEMISA

ENKUBA yataataaganyizza okulonda e Kawempe ekyawalirizza okusengula ebikozesebwa okulonda okubiteeka mu bifo ebirala. Kyokka eno abakadde balabiddwa nga bajjumbidde okulonda nga n'abamu baabaleese babasitudde.

Omuvubuka ng'asitudde omukadde Nanteza amutwala okulonda.

Ku kifo ky'obwa Mmeeya, ky'abaddeko  Dr. Emmanuel Sserunjogi wa NUP, Ashiraf Jjuuko Kiwanuka (Independent), Juma Wasswa NRM , Ramanthan Lukwago DP ne Muhamad Mutazindwa FDC.

Mu bifo ebirondebwamu ebimu  baabadde tebakkirizaayo baamawulire ng'okukulabako ne kkamera owulira kibooko. Kino okusinga ky'abadde mu Mayinja zooni awaayiriddwa amagye nga kigambibwa waabaaddeyo abeesimbyewo abaabadde babba obululu.

Omuwala ng'ayamba omukadde okulonda.

Akalulu akasinze okubaamu ebbugumu ke ka Muhamad Nsubuga  owa NUP ng'ono yakwatibwa ku misango gy'okusangibwa ne magaziini z'amasasi ng'era yeesimbyewo ku bwakansala bw'omuluka gwa Makerere III e Kawempe. Kyokka kino tekyalobedde bantu kumulonda.

Omuwala ng'akutte muzeeyi ku mukono bagenda okulonda.

Ye Moses Mutebi ne Zaituni Ndagire bazadde ba Nsubuga baategeezezza nti mutabani waabwe bwayitamu beetegefu okukola emirimu gy'omu kitundu gye yandibadde akola okutuusa ng'ayimbuddwa.