JOSEPH Sekyewa 24 eyali omuvuzi wa boda e Kabuusu alaajanidde abazirakisa okumuyamba bamusondere ssente obukadde 11 asobole okulongoosebwa omutwe gwe baakuba ennyondo amagumba ne gaabika ne bamubbako ppikippiki ye.
Sekyewa agamba nti obuzibu buno yabufuna nga June 25, 2018, kojja we Tonny Kakooza bwe yamukubira essimu ng'ayagala amwazike bodaboda ye UEF 741K nga baali baakusisinkana e Busaabala ku ssaawa 9:00 ez'ekiro.
Bwe yatuukayo yamusanga n'abantu abalala babiri be yali amanyi (Kharim Kafuuma ne Hamza) ne bamulagira ave ku ppikippiki.
Yalemerako ne balwana awo Kafuuma we yamukubira ennyondo ku mutwe ate Kakooza n'amuluma engalo, Hamza n'amufumita ekiso ku mutwe ne ku kutu. Agamba yaddamu okutegeera ng'ali mu ddwaaliro e Mulago.
Bwe baamusiibula yaggulawo omusango ku poliisi y'e Katwe era Kakooza ne Kafuuma baakwatibwa nga bali mu kkomera e Luzira.
Wabula Sekyewa agamba nti ayita mu bulumi. Baamulongoosa amagumba agamu ne bagaggyamu omutwe ne gujjamu ekinnya. Agamba yeetaaga obukadde 11 baddemu bamulongoose. Alina obuyambi abuyise ku 0702514008.
