6 basimattuse okufiira mu ttakisi ebuseeko omupiira ne yeevulungula

Bya John Bosco Sseruwu

ABASAABAZE abasoba mu mukaaga basimattuse okufiira mu kabenje ttakisi mwe babadde bw'ebuseeko omupiira ne yeevulungula emirundu egiwera.

Ddereeva Yasin Kimbugwe (wakati) ne kondakita we nga bali n'owa ttulafiki.

Bino bibadde Lukaya e Kalungu ku luguudo lwa Kampala-Masaka nga ttakisi eno nnamba UBD 153X ebadde eva mu bitundu by'e Ssembabule okwolekera Kampala okusinziira ku ddereeva waayo Yasin Kimbugwe.

Kasiringi ng'esikayo ttakisi.

Ono annyonnyodde nti akomye okutegeera ng'alaba omupiira gw'omu maaso gubuuseeko ku mmotoka eno nga gumukulembedde gwevuga. Agenze okuddamu okutegeera ng'abadduukirize babasikamu ng'emaze okugwa wabula bonna tewali afunye kisago ky'amaanyi.

Poliisi y'ebidduka e Lukaya emmotoka eno egisise ate abasaabaze ne bafuna endala ne beeyongerayo n'olugendo.