BUSOGA United FC mu liigi ya babinywera eyongedde okuggumira ne bamusaayimuto 3 abasuumusiddwa okuva mu ttiimu ento n'abalala 4 abaguliddwa mu kaweefube w'okulaba nga bawona ekyambe sizoni eno.
George William Kalyowa, Ibrahim Ekollot ne Elvis Ngonde (basuumusiddwa okuva mu ttiimu ento) ku ndagaano ya myaka ebiri, Shaka Ssozi(Nyamityobora FC), Waigona Isaac(Igang Young FC) Benda Byron(Edgars Academy), Benard Wamusi(Kataka United FC) be balala abeegasse ku ttiimu.
Leero(Lwakutaano February 11,2021) bakyalidde Onduparaka FC nga baswakidde okufuna wiini yaabwe esooka mu mipiira 6 egya liigi sizoni eno.
Andrew Ndyabahika akulira emirimu mu ttiimu ya Busoga United FC agamba nti sizoni eno ebadde tabatandikidde bulungi naye kati ky'ekiseera balwanyise obutasalibwako nga bukyali.
"Bano bakyali baana bato abalina ennyonta ate ekitone bakirina tukkiriza nti bagenda kutwongerako kinene," Ndyabahika bwe yategeezezza.
Busoga United FC eri mu kifo kya 14 n'akabonero kamu mu mipiira 5.
